Европа Иттифоқининг ташқи сиёсат бўйича раҳбари Кайа Каллас душанба куни Ғазода жанглар қайта бошланганидан сўнг Исроил ва ҲАМАС ўртасидаги музокараларни қайта бошлашга чақирди.

«Исроил ўзини ҳимоя қилиш ҳуқуқига эга, аммо ҳарбий ҳаракатлар мутаносиб бўлиши керак», – деди Европа дипломатияси раҳбари Кайа Каллас, можарога барҳам бериш учун музокараларни қайта бошлаш зарурлигини таъкидлаб.

Исроил ташқи ишлар вазири Гидеон Саар билан Қуддусда бўлиб ўтган учрашувда Каллас «зўравонлик кўпроқ зўравонликни келтириб чиқариши»га урғу берган.

«Биз ҳозир кўраётган нарса хавфли авж олиб бормоқда. Бу гаровга олинганлар ва уларнинг оилалари учун ноаниқликни келтириб чиқаряпти. Фаластин халқи ўртасида террор ва ўлимни ёйяпти», – деди Европа дипломатияси раҳбари.

Исроил ташқи ишлар вазири бунга жавобан жангарилар Исроил шартларини бажарса, жумладан, гаровга олинганларни озод қилса, «уруш эртага тугаши мумкин»лигини айтган.

Эслатиб ўтамиз, оташкесимнинг биринчи босқичида гаровга олинган 25 нафар исроиллик ва яна 8 кишининг жасади Тел-Авивга топширилди. Исроил томони эса икки мингга яқин фаластинлик маҳбусни қамоқдан озод қилди.

Икки томон феврал ойи бошида ўт очишни тўхтатишнинг навбатдаги босқичи бўйича музокараларни бошлаши кутилган эди, бунда фаластинлик асирлар эвазига қолган 59 нафар гаровга олинган (уларнинг камида ярми ўлган деб ишонилади) озод этилиши, ўт очишни тўхтатиш муддати узайтирилиши ва Исроил қўшинларини олиб чиқиб кетиши керак эди. Бироқ, бу музокаралар ҳали бошланмади.

«Музокараларни қайта бошлаш – икки томон учун ҳам тинчликка эришишининг ягона мумкин бўлган йўлидир», – деб таъкидлади Каллас.

Бироқ у Европа Иттифоқи келажакда ҲАМАСнинг анклавни бошқаришдаги ролини кўрмаслигини таъкидлаган ва узоқ муддатли тинчликка эришиш учун Ғазонинг келажаги бўйича муҳокамаларда иштирок этишга тайёрлигини билдирган.