Американинг Массачусетс штати Спрингфилд шаҳар полицияси супермаркетда харидорларни қучоқлаб, шундан сўнг уларга янги коронавирус инфекциясини юқтирганини маълум қилган эркак қидирилмоқда. Бу ҳақда «New York Post» хабар берган.

Нотаниш кимса ниқоб, қора футболка ва камуфляж шортида маҳаллий «Walmart» супермаркетига кириб келган ва бегоналарни сўраб ҳам ўтирмасдан қучоқлай бошлаган. Шундан кейин уларга: «Шунчаки коронавирус билан қучоқладим. Энди сизда ҳам COVID-19 бор», — дея ҳазиллашган ва жуфтакни ростлаган.

Полиция америкаликни қидирувга берган. У одамларга тажовуз қилишда, таҳқирлашда ва террорчилик таҳдидини яратишда айбланмоқда. Гумонланувчи шахс янги коронавирус инфекцияси билан касаллангани ёки бу шунчаки ҳазил эканлиги номаълум. Маҳаллий полиция вакили Райан Уолшнинг сўзларига кўра, нима бўлганда ҳам, эркакнинг хатти-ҳаракатини оқлаб бўлмайди, бу жиноят ҳисобланади. Унинг қилмиши дўконнинг миналаштирилгани ҳақида ёлғон хабар бериш билан баравар.