Европа иттифоқи Украинага ҳужум қилган Россияга қарши санкцияларнинг олтинчи пакетини тайёрлаяпти. Бу ҳақда Еврокомиссия раиси Урсула фон дер Ляйен бугун, 17 апрель куни «Bild am Sonntag»га берган интервьюсида маълум қилди.

Еврокомиссия ҳозир ақлли механизмлар ишлаб чиқариш жараёнида, уларнинг қўлланилиши натижасида навбатдаги санкциялар Россия нефтини ҳам қамраб олади, деди Урсула фон дер Ляйен.

Шунингдек, Еврокомиссия раҳбари янги пакет санкциялари Россия банк секторига ҳам қаратилиши мумкинлигига урғу берди.

«Айниқса, ушбу секторнинг 37 фоизини ташкил этувчи Сбербанкни ўрганяпмиз», — деди у.

Брюссел энергетика билан боғлиқ масалаларни ҳам кўриб чиқмоқда.

«Медуза» нашри ёзишича, Россиянинг энг йирик банки «Сбербанк» ҳозирча санкцияларга тушмаганди, чунки «Газпромбанк» билан биргаликда Россия нефти ва гази ҳисоб-китоблари учун асосий каналлардан ҳисобланади. Евроиттифоқ шу пайтгача Россияга санкцияларнинг бешта пакетини қўллаган. Рус банкларидан «ВТБ», «Открытие», «Новикомбанк» ва «Совкомбанк» евросанкцияларга тушган, улар SWIFT тизимидан узиб қўйилганди.