Дунё мусулмонлари Рамазонни қандай ўтказмоқда? (фото)

Бош саҳифа
Хориж
Дунё мусулмонлари Рамазонни қандай ўтказмоқда? (фото)

Хориж

20.04.2021 12:24 0 2097

Идлиб музофотида яшовчи йигит Рамазонга етказгани шукронасига соат минорасини чироқлар билан безамоқда.

Фото: AFP

Муборак Рамазон ойи бу йил ҳам кучли карантин шароитида ўтмоқда. Миллионлаб мўминлар талпинган мўътабар масканлар – Маккадаги Масжид ул-Ҳаром ҳамда Мадинадаги Масжид ун-Набавийда қатъий назорат ўрнатилган. Икки муқаддас масжидга фақат коронавирус вакцинаси билан эмланган саодатли кишиларгина ибодат учун қўйилади.

Коронавирус вабоси сабаб кетма-кет иккинчи марта дунёнинг аксар мамлакатлари мусулмонлари таровеҳ намозини уйда ўқишга мажбур бўлмоқда.

Мушкул ҳолатга қарамай, вабо Аллоҳнинг синови экани ва бир кун албатта ортга чекинишига ишончи комил мусулмонлар Рамазонни айрича ихлос ила ўтказмоқда. Қуйида сайёрамиз бўйлаб Рамазон шукуҳини акс эттирувчи фотосуратлар билан танишишингиз мумкин.

Рамазон кунлари фонусларнинг бозори чаққон бўлади. Қоҳира бозори, Миср. Фото: AFP

Ислом оламининг уриб турган юраги – Каъбатуллоҳ теграсида мўминлар ижтимоий масофани сақлаган ҳолда ибодат қилмоқда. Маккаи мукаррама, Саудия Арабистони. Фото: AP

Османагич масжидида аёллар таровеҳ намози ўқимоқда. Подгорица шаҳри, Черногория. Фото: AFP

Тошкентдаги Ҳазрати имом масжиди. Бу йил Ўзбекистондаги 1370 дан зиёд масжидда хатми Қуръон ўтказилмоқда. Эпидемиологик вазиятдан келиб чиқиб, таровеҳ намозлари ҳовли ва очиқ саҳнларда адо этилмоқда. Фото: “UzA”

Бағдодлик баққол Рамазон ойида савдоси баракали бўлишидан умидвор. Ироқ. Фото: “АFP”

Рамазон ойида ўзбекистонлик қориларнинг чет мамлакатларга сафари анъанага айланди. Украина мусулмонлари идорасининг таклифига кўра Фаррух қори Худойбердиев Киевда таровеҳ намозини ўқиб бермоқда. Фото: “Ўзбекистон мусулмонлари идораси”

Мустафо пошо масжидида қори ёлғиз ҳолда Қуръони каримни тиловат қилмоқда. Скопье, Шимолий Македония. Фото: “АА”

Ўзбекистонлик имом-хатиблар ташаббуси билан Рамазоннинг илк ҳафтасида эҳтиёжманд оилаларга қарийб 2 миллиард сўмлик хайрия қилинди. Фото: “Ўзбекистон мусулмонлари идораси”