2017 йилнинг ноябрида Нью-Йорк марказида велосипедчилар йўлагида ҳаракатланиб кетаётган тинч аҳоли устига кичик юк автомобили (пикап)ни ҳайдаб, 8 кишининг ўлимига ва яна 10 дан ортиқ киши жароҳатланишига сабаб бўлган ўзбекистонлик Сайфулло Соиповга ўлим жазоси берилиши мумкин.

Бу ҳақда AP ахборот агентлиги хабар бермоқда.

Агентликка кўра, у жорий йил 26 январ, пайшанба куни қатор жиноятларда айбдор деб топилди ва ўлим жазосига ҳукм қилиниши мумкин.

Судда ўнлаб ҳакамлар икки кун давомида мазкур жиноий ишни қарийб етти соат муҳокама қилиб, 34 ёшли Соиповни 28 та жиноят, жумладан, рэкетлик ва хорижий террорчи ташкилотни қўллаб-қувватлаш мақсадида одам ўлдиришда айблашди. Ҳакамлар 6 февралдан сўнг судга қайтиб, қўшимча далилларни эшитишади. Бу эса Соиповнинг қатл этилиши ёки умрининг қолган қисмини қамоқда ўтказиши ҳақидаги қарорнинг қабул қилинишида асосий ролни ўйнайди.

Прокурорларнинг таъкидлашича, Соипов «Исломий давлат» гуруҳига аъзо бўлиши учун тинч аҳолига ҳужум қилган.

Соиповнинг ҳимоячиси эса унинг бу ҳодисада «Исломий давлат» гуруҳи билан тил бириктирмаганини айтиб, судьялардан рэкетлик айблови бўйича уни оқлашларини сўраган.

Шунингдек, адвокат, ўлим жазоси жараёни мазкур воқеанинг эртасигаёқ Соиповга ўлим жазосини бериш кераклигини ёзиб чиққан собиқ президент Доналд Трамп томонидан тузатиб бўлмас даражада бузилганини айтмоқда.

Маълумот учун, Соипов 2010 йилда Ўзбекистондан қонуний равишда АҚШга кўчиб келган ва Нью-Жерси штатининг Патерсон шаҳрига келишдан олдин Огаё ва Флоридада ҳам яшаган.