Android qurilmalar uchun Xabar.uz mobil ilovasi. Yuklab olish ×

Trampning savdo urushi «ayfoncyevarlar»ga qimmatga tushmoqda

Trampning savdo urushi «ayfoncyevarlar»ga qimmatga tushmoqda

AQSh prezidenti Donald Tramp tomonidan Xitoy tovarlariga bojlarning oshirilishi ortidan iPhone smartfonlari narxi keskin oshishi kutilmoqda, deb xabar berdi Reuters agentligi.

Xitoy mahsulotlariga 54 foizlik boj joriy etilishi ortidan Apple mushkul tanlov qarshisida qoldi: shirkat yo tovarlar narxini keskin oshirishi, yoki kamtarona foydaga qanoat qilishi kerak bo‘ladi.

Tahlilchilar Apple shirkatining butun dunyoda xaridorgir bo‘lgan mahsulotlari 30-40 foizga qimmatlashishini bashorat qilmoqda. Buning dastlabki alomatlari allaqachon namoyon bo‘ldi: payshanba kuni kompaniya aksiyalari 9,3 foizga arzonladi. Bu pandemiya davridan buyon kuzatilmagan pastga sho‘ng‘ishdir.

Tramp boshlagan savdo urushi sabab hozirda eng arzon sanalgan iPhone 16 smartfoni narxi 799 dollardan 1142 dollarga, 1599 dollarlik Pro Max rusumli qurilmalar esa 2300 dollarga oshishi aytilmoqda.

Tramp birinchi prezidentlik davrida ham kompaniyalarni ishlab chiqarishni AQShga ko‘chirishga majburlash uchun bojlar joriy qilgan, ammo o‘shanda Apple shirkatiga istisno tariqasida bojlar tatbiq etilmagan edi.

Apple har yili dunyo bo‘ylab 220 milliondan ziyod iPhone smartfonlarini sotadi. AQSh, Yevropa va Xitoy shirkatning asosiy bozori hisoblanadi. Smartfon narxining oshishi ortidan Samsung shirkatining mavqei mustahkamlanishi kutilmoqda.

Avval xabar berganimizdek, AQSh prezidenti Donald Tramp 2-aprel kuni 183 davlat, jumladan, O‘zbekistonga 10 foizdan 50 foizgacha miqdorda import bojlarini joriy qildi.

Buning ortidan AQSh fond bozori bir kunda qariyb 3 trillion dollar yo‘qotdi.

Fond bozorlari keskin qulashi sabab dunyoning eng badavlat 500 kishisi 208 milliard dollarni boy berdi.

Darvoqe, Oq uyning savdo urushiga javoban Xitoy AQShdan keltiriladigan barcha mahsulotlarga qo‘shimcha 34 foizlik boj joriy qildi. Rasmiy Pekin fikricha, AQShning boj siyosati «xalqaro savdo me’yorlarini buzadi va Xitoyning qonuniy huquq-manfaatlariga ziyon keltiradi».

Ma’lumot o‘rnida, 2024-yilda Xitoy va AQSh o‘rtasidagi savdo aylanmasi 688 milliard dollarni tashkil etgan.

Izohlar

Izoh qoldirish uchun saytda ro'yxatdan o'ting

Kirish

Ijtimoiy tarmoqlar orqali kiring