Kiyevda Rossiyaning navbatdagi raketa hujumini qaytaruvchi havo hujumidan mudofaa tizimi ishlamoqda. Mahalliy aholining xabar berishicha, shaharda portlashlar yuz bergan.

«O‘z xavfsizligingiz haqida qayg‘uring — havo hujumi signali paytida boshpanalarda qoling», — deya xabar beradi viloyat ma’muriyati.

Ukraina Harbiy-havo kuchlari Jitomir va Rovne viloyatlari havo hududida qayd etilgan raketalar yo‘nalishini o‘zgartirib, Kiyev tomon uchib ketgani haqida xabar bergan.

«X-47M2 «Kinjal» aeroballistik raketalarining Kiyev yo‘nalishida uchirilishi qayd etildi», — deb xabar qildi Harbiy havo kuchlari mahalliy vaqt bilan ertalab soat 5 da.

Bir necha daqiqadan so‘ng Ukraina poytaxtida raketalarning takror uchirilishi qayd etildi.

Kiyev meri Vitaliy Klichko raketa hujumining ilk oqibatlari haqida gapirdi.

Ukraina poytaxtining bir qancha tumanlarida rus raketalari qoldiqlari turar-joy binolari, korxonalar, bolalar bog‘chasi va avtomobillar ustiga tushgani qayd etildi, dedi Ukraina poytaxti meri Vitaliy Klichko.

Svyatoshinskiy tumanida raketa qoldiqlari bolalar bog‘chasi va turar-joy binosi ustiga tushdi. Bir ayol yaralangan.

Shevchenko tumanida avtomobillar va turar-joy binosidagi xonadon yonmoqda. Uch kishi jarohatlangan.

Podolsk viloyatida ikki korxona hududiga raketalar qoldiqlari tushdi. Shuningdek, transformator podstansiyasi va ikki qavatli noturarjoy binosida ham yong‘in sodir bo‘lgan. Bundan tashqari, turar-joy binosining tomi yonmoqda.