O‘tgan oyda «Google» kompaniyasi o‘z resurslarini AQSh Mudofaa vazirligining «Maven» loyihasini amalga oshirish uchun taklif qilgandi. Mazkur loyiha videoroliklarni tahlil qilishga mo‘ljallangan kompyuter algoritmlarini yaratish bilan shug‘ullanadi. Bunga javoban «Google»ning 3100 nafardan ortiq xodimi kompaniya bosh direktori Sundar Pichaiga maktub yozib, «Google» harbiy ishlarga aralashmasligi kerakligini» so‘radi, deb xabar beradi «Hi-News».

«Maven» loyihasi ustidagi ishlar o‘tgan yilning aprelida boshlangan. «Google»ning loyihadagi o‘rni nimadan iborat ekanligi hozircha aniq bo‘lmasada, Pentagonning ushbu tadqiqot tashabbusi uchuvchisiz uchar qurilmalar yordamida olingan tasvirlarni yaxshiroq tahlil qilishga yo‘naltirilgan. «Google» o‘zining «TensorFlow» dasturiy ta’minotiga kirishga ruxsat berganini tasdiqladi.

«Alphabet» direktorlar kengashi tarkibiga kiruvchi Dayana Grinning aytishicha, ushbu texnologiyalardan «dronlarni boshqarish» yoki «qurollarni ishga tushirish» yo‘lida foydalanilmaydi. Biroq Pichaiga maktub yozgan xodimlar uchun bu kifoya qilmadi. Maktubda qayd etilishicha, «texnologiya harbiylar qo‘liga tushishi bilan ulardan istalgan maqsadda foydalanish mumkin bo‘ladi».