Yevropa Chempionlar ligasi chorak finalida (pley-off) «Bavariya» klubi «Barselona»ni qaqshatqich mag‘lubiyatga uchratdi.

Myuller 4-daqiqadayoq bavariyaliklarni hisobda oldinga olib chiqdi. Asosiy tarkibda o‘yinga tushgan 30 yoshli forvard YeChLda o‘yinlar soni bo‘yicha nemis futbolchilari o‘rtasida rekord o‘rnatdi: «Barselona»ga qarshi o‘yin Tomas uchun turnirdagi 113-si bo‘ldi.

Oradan bir necha daqiqa o‘tib Alaba o‘z darvozasiga gol kiritib qo‘ydi — 1:1.

Birinchi taym o‘rtalarida, 10 daqiqa ichida uchta gol kiritgan «Bavariya» ilgarilab ketdi. Gollarni Perishich, Gnabri va yana Myuller kiritishdi. «Barselona» YeChL tarixidagi o‘yinlarida birinchi marta bitta taymda to‘rtta gol o‘tkazib yubordi. Ammo bu boshlanishi edi...

Tanaffusdan so‘ng Suares gol kiritib, oradagi farqni qisqartirdi: «Barselona» — «Bavariya» — 2:4.

63-daqiqada esa Kimmix o‘z vatandoshi Mark-Andre ter Shtegenni xafa qildi: 2:5.

Nihoyat Levandovskiyga ham navbat kelib hisobni «Bavariya» foydasiga 6:2 ga oshirdi.

Tablodagi so‘ngi raqamlarni Koutino o‘rnatdi — uning dubli evaziga «Bavariya» kataloniyaliklar ustidan 8:2 hisobida g‘alaba qozondi.

Faktlar:

• «Barselona» har ikki taymda 1:4 hisobida yengildi.
• «Barselona» 1946-yildan beri ilk marotaba bitta o‘yinda 8 ta gol o‘tkazib yubordi.
• 13 yildan beri ilk marta ispan klublari YeChL yarimfinalisiz qolishdi.
• 2005/2006-yilgi mavsumdan beri ilk marotaba YeChL yarimfinali Messi va Ronaldusiz o‘tadi.

Inqiroz kimniki: «Barselona»nikimi, ispan klublarinikimi yoki Messi va Ronalduning davri o‘tdimi?

«Barselona» prezidenti o‘yin tugashi bilan Kiki Seten va Erik Abidalni iste’foga chiqarib yubordi.

«Bavariya» YeChL yarimfinalida «Manchester Siti» — «Lion» juftligi g‘olibi bilan to‘qnash keladi.

Yevropa Chempionlar ligasi. Chorak final

«Barselona» (Ispaniya) — «Bavariya» (Germaniya) — 2:8

Gollar: Suares (57) — Myuller (4, 31), Alaba 7 (avtogol), Perishich (21), Gnabri (27), Kimmix (63), Levandovskiy (82), Koutino (85, 89).