O‘zbekistonlik Olimpiada chempioni Oksana Chusovitina Moskva shahrida o‘tkazilgan sport gimnastikasi musobaqasining tayanib sakrash bahslarida birinchi o‘rinni egalladi.

Uning harakatlari hakamlar tomonidan 14,333 ballga baholangan. Ikkinchi va uchinchi o‘rinlarni esa rossiyalik sportchilar Angelina Melnikova (14,017) va Eleonora Afanaseva (13,850) egallagan.

Aytish kerakki, Chusovitina g‘olib chiqqan Voronin kubogi musobaqasi 1993-yildan beri o‘tkazib kelinadi hamda Xalqaro gimnastika federatsiyasi jadvalidan o‘rin olgan.

Voronin kubogida anchadan buyon ishtirok etmagan edim va taklifni jon deb qabul qildim. Ushbu musobaqa nafaqat yoshlar o‘zini namoyon etishlari uchun, balki biz «qariyalar» uchun ham juda qiziqarli. Bu yerda ortimizda kimlar qolayotgani, «panjamizga kimlar panja urayotgani»ni ko‘ramiz.

Oksana Chusovitina

Oksana Chusovitina yetti bor Olimpiada ishtirokchisi sifatida «Ginness rekordlari» kitobiga kirgan. U 1992 yili Barselonada o‘tkazilgan o‘yinlardan buyon muntazam ravishda Olimpiya o‘yinlarida ishtirok etib kelyapti.