7-oktyabr, juma kuni Sankt-Peterburgda MDH davlatlari rahbarlarining norasmiy uchrashuvi bo‘lib o‘tadi. Bu haqda RF prezidentining matbuot kotibi Dmitriy Peskov ma’lum qildi.

«Ertaga Rossiya prezidenti Vladimir Putin Sankt-Peterburgda ishlaydi. Bir qator xalqaro telefon suhbatlari rejalashtirilgan. Shuningdek, kunning ikkinchi yarmida MDH davlatlari rahbarlarining norasmiy uchrashuvi bo‘lib o‘tadi», – dedi u.

Peskov buni kelgusi hafta Ostonada bo‘lib o‘tadigan MDH sammitiga tayyorgarlik ko‘rish oldidan muhim voqea deb atadi.

MDH davlatlari rahbarlarining so‘nggi norasmiy uchrashuvi 2021-yilning 28-dekabrida bo‘lib o‘tgan va o‘shanda ham Putin hamkasblarini shimoliy poytaxt  – Sankt-Peterburgga taklif qilgan edi.

Unda  mezbon Rossiya davlati prezidenti hamda O‘zbekiston, Ozarbayjon, Armaniston, Belorus, Qozog‘iston, Qirg‘iziston, Tojikiston va Turkmaniston davlatlari rahbarlari, shuningdek, Qozog‘istonning birinchi prezidenti Nursulton Nazarboyev ishtirok etgan edi.