Yo‘l qurilishi va ta’miriga sarflangan pulni nazorat qilish imkonini beruvchi «Shaffof Yo’l» onlayn axborot platformasi ishga tushiriladi.

Bu regulation.gov.uz portalida joylashtirilgan Prezident qarori loyihasida nazarda tutilgan.

Yangi platformada:

- avtomobil yo‘llari qurilishi bo‘yicha barcha davlat dasturlari va mahalliy dasturlar bir joyda jamlanadi;

- qurilishi va ta’mirlanishi rejalashtirilgan yo‘llarning barchasi onlayn-xaritada yaqqol ko‘rinib turadi;

- shu xaritaning o‘zida qurilish yoki ta’mirlashni amalga oshirayotgan tashkilot, sarflanayotgan mablag‘, bajarilgan ishlarning ahvolini bevosita kuzatib borish imkoni paydo bo‘ladi;

- yo‘l jamg‘armalarining barcha tushumlari real vaqt rejimida platformada «onlayn-hisoblagich»da ko‘rinib turadi. Masalan, avtomobilingizni ro‘yxatdan o‘tkazganda yo‘l jamg‘armasiga to‘langan mablag‘ qayerga ketganini shu zahoti bilib olsa bo‘ladi;

- aholida yo‘llar nosozligi, harakatlanish uchun paydo bo‘lgan muammolar haqida foto- va videomurojaatlar qoldirish imkoniyati paydo bo‘ladi.