O‘zbekiston Respublikasi prezidenti Shavkat Mirziyoyevning matbuot kotibi Sherzod Asadov tomonidan brifing o‘tkazildi. Brifingda Turkiy davlatlar kengashining Samarqand sammiti bilan bog‘liq tafsilotlar ma’lum qilindi.

Sherzod Asadov shuningdek turli davlatlar rahbarlari Samarqandga qachon yetib kelishini ham aytib o‘tdi. Unga ko‘ra, hozirga qadar tadbirda ishtirok etish uchun Vengriya Bosh vaziri Viktor Orban hamda Ozarbayjon Respublikasi Prezidenti Ilhom Aliyev Samarqand shahriga yetib kelgan bo‘lsa, bugun kun davomida Turkiya Respublikasi Prezidenti Rejep Tayyip Erdog‘an, Qozog‘iston Respublikasi Prezidenti Qasim-Jomart Toqayev, Qirg‘iz Respublikasi Prezidenti Sadir Japarovlar kutib olinadi. Ertaga 11-noyabr kuni tongda Turkmaniston Milliy Kengashi Xalq Maslahati Raisi Gurbanguli Berdimuhamedovning tashrifi kutilyapti.

Sammit davomida quyidagi tadbirlar rejalashtirilgan:

- Kunning ikkinchi yarmida Davlat rahbarining Turkiya Respublikasi Prezidenti Rejep Tayyip Erdog‘an, Ozarbayjon Respublikasi Prezidenti Ilhom Aliyevlar bilan ham ikki tomonlama uchrashuvlari bo‘lib o‘tadi.
- Ertaga prezident Shavkat Mirziyoyevning Turkmaniston Milliy Kengashi Xalq Maslahati Raisi Gurbanguli Berdimuhamedov bilan ham uchrashuvi rejalashtirilgan.
- Bugun kechki vaqt Delegatsiya rahbarlari Samarqand turizm markazi hududidagi «Boqiy shahar» majmuasiga tashrif buyuradilar. Turkiy davlatlar tashkiloti a’zo mamlakatlari milliy folklor san’atini o‘zida ifoda etgan konsert dasturi tashkil etiladi.
- Samarqand Sammitining asosiy tadbiri - Turkiy davlatlar tashkiloti davlat rahbarlari kengashi majlisi ertaga 11-noyabr kuni Kongress markazda bo‘lib o‘tadi.