Ўзбекистон Республикаси президенти Шавкат Мирзиёевнинг матбуот котиби Шерзод Асадов томонидан брифинг ўтказилди. Брифингда Туркий давлатлар кенгашининг Самарқанд саммити билан боғлиқ тафсилотлар маълум қилинди.

Шерзод Асадов шунингдек турли давлатлар раҳбарлари Самарқандга қачон етиб келишини ҳам айтиб ўтди. Унга кўра, ҳозирга қадар тадбирда иштирок этиш учун Венгрия Бош вазири Виктор Орбан ҳамда Озарбайжон Республикаси Президенти Илҳом Алиев Самарқанд шаҳрига етиб келган бўлса, бугун кун давомида Туркия Республикаси Президенти Режеп Таййип Эрдоған, Қозоғистон Республикаси Президенти Қасим-Жомарт Тоқаев, Қирғиз Республикаси Президенти Садир Жапаровлар кутиб олинади. Эртага 11 ноябр куни тонгда Туркманистон Миллий Кенгаши Халқ Маслаҳати Раиси Гурбангули Бердимуҳамедовнинг ташрифи кутиляпти.

Саммит давомида қуйидаги тадбирлар режалаштирилган:

- Куннинг иккинчи ярмида Давлат раҳбарининг Туркия Республикаси Президенти Режеп Таййип Эрдоған, Озарбайжон Республикаси Президенти Илҳом Алиевлар билан ҳам икки томонлама учрашувлари бўлиб ўтади.
- Эртага президент Шавкат Мирзиёевнинг Туркманистон Миллий Кенгаши Халқ Маслаҳати Раиси Гурбангули Бердимуҳамедов билан ҳам учрашуви режалаштирилган.
- Бугун кечки вақт Делегация раҳбарлари Самарқанд туризм маркази ҳудудидаги «Боқий шаҳар» мажмуасига ташриф буюрадилар. Туркий давлатлар ташкилоти аъзо мамлакатлари миллий фольклор санъатини ўзида ифода этган концерт дастури ташкил этилади.
- Самарқанд Саммитининг асосий тадбири - Туркий давлатлар ташкилоти давлат раҳбарлари кенгаши мажлиси эртага 11 ноябр куни Конгресс марказда бўлиб ўтади.