Bugun, 15-aprel kuni Yangiyo‘l shahar Navro‘z dahasida joylashgan 4-uy oldida 3 nafar notanish shaxslar daydi itlarni otib ketishmoqda izohi bilan ijtimoiy tarmoqlarda xabar tarqatildi.

IIBB Axborot xizmati xabar qilishicha, mazkur holat yuzasidan, bugunning o‘zida Toshkent viloyati IIBB JQB va Yangiyo‘l shahar IIB JQB xodimlari tomonidan olib borilgan tezkor surushtiruv ishlari davomida ushbu notanish shaxslar aniqlandi.

Ular: Yangiyo‘l shahar Navro‘z dahasida yashovchilar 1976 yilda D.S., 1982-yilda tug‘ilgan A.X. va 1983-yilda tug‘ilgan A.K. ekanligi aniqlangan va ulardan 2 dona sport pnevmatik (tir) miltig‘i, hujjatlari bilan daliliy ashyo sifatida rasmiylashtirilib, olingan.

Shuningdek, ular suhbat jarayonida o‘zlariga tegishli bo‘lgan sport pnevmatik (tir) miltiqlarini Toshkent shahridagi «Dinamo» sport do‘konidan hujjatlar asosida rasmiylashtirib olganligini va karantin davrida yosh bolalari uyda bo‘lganligi sababli, xavfsizlik yuzasidan ushbu qurollarni tanishi «Ulug‘bek» ismli shaxsning uyiga olib ketayotganligini va hech qanday jonivorlarga qarata o‘q otmaganligini ma’lum qilishgan.

Hozirda mazkur holat yuzasidan Yangiyo‘l tumani IIB tomonidan tezkor surishtiruv ishlari olib borilmoqda. Batafsil ma’lumot beriladi.