Joriy yilning 25-fevral kuni Surxondaryo viloyati Uzun tumani sudi qarori bilan 50 yoshli fuqaro Tohir Xaitov bezorilikda ayblanib, unga 6 sutkalik qamoq jazosi tayinlangan. Shundan so‘ng ayblanuvchi Termiz shahridagi qamoqxonaga olib ketilayotgan vaqtda sog‘lig‘i yomonlashadi va Sariosiyo tumani tibbiy yordam bo‘limiga olib kelinadi.

Ko‘p o‘tmay shifokorlar uning vafot etganini malum qiladi.

O‘lim sababini o‘rganib chiqqan Sariosiyo tuman sud-tibbiy ekspertizasi xulosasida marhum yurak ishemik kasalligi, infarkt miokardi, yurak anevrizmi va yurak tamponatsiyasi oqibatida vafot etgani qayd etilgan. Ekspertiza ko‘rigi vaqtida uning badanida biror-bir tan jarohatlari va ularning izlari aniqlanmaganligi ko‘rsatilgan.

Shunday qilib, Ombudsmanga taqdim etilgan yakuniy ma’lumotlarga ko‘ra, fuqaro T.Xaitovning 2025-yil 25-fevralda Sariosiyo tumani tibbiyot birlashmasida vafot etganligi holati yuzasidan tuman prokuraturasi tomonidan tergovga qadar tekshiruv harakatlari yakunlangan va tekshiruv natijasiga ko‘ra, mazkur holatda biror-bir shaxsning harakatida jinoyat tarkibi aniqlanmaganligi sababli JPKning 83-moddasi 2-bandiga asosan jinoyat ishi qo‘zg‘atishni rad qilish haqida qaror qabul qilingan.