Surxondaryo viloyati Jarqo‘rg‘on tumanida «Hizb ut-tahrir» a’zosi 5 yilga ozodlikdan mahrum etildi. Bu haqda Ichki ishlar vazirligi axborot xizmati xabar berdi.

Qayd etilishicha, 2022 yil mart oyida huquqni muhofaza qilish idoralari tomonidan amalga oshirilgan tezkor tadbirlar natijasida O‘zbekiston hududida faoliyati taqiqlangan «Hizb ut-tahrir» diniy-ekstremistik tashkiloti tarafdori — 1981 yilda tug‘ilgan Alimov Botir Xurramovich ushlangan.

Tergov jarayonida ma’lum bo‘lishicha, Alimov Facebook va «Odnoklassniki» ijtimoiy tarmoqlarida «Oxirat hisobi» nomli profili orqali ekstremistik g‘oyalarni targ‘ib qilib, virtual do‘stlariga «Hizb ut-tahrir»ning audio-videomateriallarini tarqatib kelgan.

Uning jinoiy harakatlari ayni paytda Polshada yashirinib kelayotgan, xalqaro qidiruvda bo‘lgan shaxslar tomonidan boshqarilgan.

Iyul oyida ish jinoyat ishlari bo‘yicha Surxondaryo viloyat sudi tomonidan ko‘rib chiqilib, u 5 yil muddatga ozodlikdan mahrum qilish jazosiga hukm qilindi.