2024-yilning aprel oyida Yer yuzida ketma-ket 11-oy rekord darajadagi issiqlik kuzatildi. Yevropa iqlim o‘zgarishi xizmati bo‘lgan Copernicus (C3S) ekspertlari shunday xulosaga keldi, deb xabar bermoqda Bloomberg agentligi.

Xizmat ma’lumotlariga ko‘ra, o‘tgan oy global harorat o‘rtacha tarixiy ko‘rsatkichlardan 1,58°C yuqori bo‘lgan va bu aprel oylari tarixidagi eng issiq bo‘ldi.

Bundan tashqari, so‘nggi 12 oy ichida Yerdagi harorat sanoat inqilobidan oldingi darajadan 1,61°C ga ko‘tarilib, xavfsiz isish chegarasi 1,5°C dan oshib ketdi.

«El-Nino va boshqa tabiiy tsikllar tufayli haroratning o‘zgarishi va ketishi bilan birga, issiqxona gazlari kontsentratsiyasining ortishi tufayli okean va atmosferada qoplangan qo‘shimcha energiya global haroratni yangi rekordlar darajasiga ko‘tarishda davom etadi», dedi Copernicus direktori Karlo Buontempo.

Xizmat hisob-kitoblari oylik va mavsumiy prognozlarni ishlab chiqarish uchun butun dunyo bo‘ylab sun’iy yo‘ldoshlar, samolyotlar, kemalar va ob-havo stansiyalaridan olingan o‘lchovlarga tayanadi.

O‘zgidromet izohiga ko‘ra esa, joriy yilning aprel oyi O‘zbekistonda harorat tartibi bo‘yicha iqlimiy qiymatlardan iliqroq bo‘ldi.

Respublika hududining katta qismida o‘rtacha oylik havo harorati me’yordan
1-2 darajaga, Qoraqalpog‘iston Respublikasi, Xorazm viloyatida va respublikaning cho‘l hududlarida me’yordan 3-5 darajaga yuqori bo‘lgan.

O‘zbekistonning shimoli-g‘arbiy qismi bo‘yicha o‘tgan oy meteorologik kuzatuvlar tarixidagi eng iliq aprel oylari beshligiga kirdi.

Oy davomida kunduzgi harorat 15-20 daraja iliqdan 27-32 daraja iliqqacha o‘zgarib turdi. Respublika shimolida, eng chekka janubida va cho‘l hududlarida eng iliq kunlarda havo ba’zi joylarda 34-35 daraja iliqqacha isidi.

Harorat kechalari 10-15 daraja iliq atrofida, ba’zi joylarda 17-20 daraja iliqqacha bo‘ldi va faqat eng salqin kechalarda 4-9 daraja iliqqacha pasaydi.