Saudiya Arabistoni hukumati Livan elchisini mamlakatdan chiqarib yuboryapti, unga 48 soat muhlat berildi. Bu haqda 29-oktyabr kuni «Saudi Gazette» xabar berdi.

Saudiyaliklar Livandagi o‘z elchisini ham maslahat uchun chaqirirtirgan.

Diplomatik mojaroga Livan axborot vaziri Georg Kordaxi «Al-Jazeera» telekanaliga avgust oyida bergan intervyu sabab bo‘ldi. U Saudiya Arabistoni boshchiligidagi koalitsiyaning Yamandagi harakatlarini agressiya deya baholagandi.

Livanning MTV kanali o‘z manbalariga asoslanib xabar berishicha, Fors ko‘rfazidagi arab davlatlari hamkorlik kengashining barcha mamlakatlari (Saudiya Arabistonidan tashqari Qatar, Kuvayt, BAA, Bahrayn va O‘mon a’zo) Livan bilan diplomatik munosabatlarni uzishga tayyor.

O‘z navbatida, Livan bosh vaziri Najib Mikati Saudiya Arabistonining qaroridan afsusda ekanini bildirdi. Uning aytishicha, Bayrut saudlar podshohligi o‘z qarorini qayta ko‘rib chiqishidan umidvor va vaziyatni o‘nglash uchun bor kuch va salohiyatini sarflaydi.