Birinchi yarim yillik natijalari asosida yil oxiriga qadar hududlar va tarmoqlarda barqaror iqtisodiy o‘sishni ta’minlash bo‘yicha videoselektor bo‘lib o‘tmoqda. Yig‘ilish davomida qayd etilgan ko‘rsatkichlar haqida ma’lumot berildi.

Unga ko‘ra, o‘tgan 6 oyda yalpi ichki mahsulot 6,2 foizga o‘sgani qayd etildi. Bunga asosan sanoat – 8,5 foiz, investitsiyalar – 5,9 foiz va xizmatlar hajmi – 8 foizga oshgani hisobiga erishilgan.

O‘tgan olti oylik davr mobaynida jami 200  trillion so‘mlik sanoat mahsulotlari ishlab chiqarilgan. Shundan, Navoiy kon-metallurgiya – 26  trillion so‘m, to‘qimachilik – 15  trillion so‘m, Olmaliq kombinati – 14,5 trillion so‘m, elektr energiyasi korxonalari – 11 trillion so‘mlik mahsulotlar ishlab chiqarib, ularning ulushi jami sanoatda 37 foizni tashkil qildi.

Sanoatda yuqori o‘sish sur’atlari Qashqadaryoda – 26 foiz, Sirdaryoda – 23, Jizzaxda – 15, Toshkent shahrida – 14  va Namanganda – 12 foizni tashkil etdi.

Yig‘ilishda ta’kidlanishicha, ushbu o‘sish iqtisodiyot sohalarining o‘tgan yilga taqqoslaganda  bir maromda ishlashi hamda tashqi bozorlarda kon’yunkturaning yaxshilanishi hisobiga ro‘y bergan.

Iqtisodiy o‘sishni qo‘llab-quvvatlashda davlat resurslari ham hal qiluvchi omil bo‘lmoqda.