Qozog‘iston rasmiylari va ularning yaqinlariga deklaratsiya topshirish uchun roppa-rosa bir hafta muhlat berildi.

Bu haqda mamlakat Moliya vazirligi huzuridagi Davlat daromadlari qo‘mitasiga tayanib, Kaztag nashri xabar bermoqda.

«Umumiy deklaratsiyalashning ikkinchi bosqichida 2023 yilda 250.00-shakldagi aktivlar va majburiyatlar to‘g‘risidagi deklaratsiya davlat organlari va quyi tizim xodimlari, shu jumladan, direktorlar kengashi a’zolari, ularning turmush o‘rtoqlari tomonidan taqdim etiladi», – deyiladi rasmiy manbada.

Qo‘mitaning aniqlik kiritishicha, mamlakatda deklaratsiyani elektron shaklda topshirish muddati 2023-yil 15-sentyabrda tugaydi.

«Deklaratsiyani o‘z vaqtida topshirishga ulguring!» – deyiladi Qo‘mita chaqiruvida.

Eslatib o‘tamiz, 2022-yil 1-yanvardan O‘zbekistonda davlat xizmatchilari, davlat ulushi 50 foizdan yuqori tashkilotlar, davlat korxonalari va muassasalari rahbarlari, o‘rinbosarlari, ularning turmush o‘rtog‘i va voyaga yetmagan farzandlarining daromadlari hamda mol-mulkini majburiy deklaratsiya qilish tizimi joriy etilishi kerak edi. Biroq oradan qariyb ikki yil vaqt o‘tsa ham, tegishli qonun qabul qilinmadi.