Qashqadaryo prokurori S.I.Samadov viloyat aholisiga murojaat bilan chiqdi va mansabdor shaxslarga ham ogohlantirish yo‘lladi. Murojaat paxta-yig‘im terimi bilan bog‘liq. 

«Viloyatda 6 199 ta fermer xo‘jaliklari va 18 ta paxta to‘qimachilik klasterlari tomonidan 136 ming gektar yer maydonida yetishtirilgan paxta hosilini yig‘ib-terib olish mavsumi boshlanmoqda.

Olib borilayotgan keng ko‘lamli islohatlar natijasi o‘laroq mamlakatimiz xalqaro hamjamiyat oldida o‘z zimmasiga majburiy mehnatga va ayniqsa bolalar mehnatiga yo‘l qo‘ymaslik bo‘yicha olgan majburiyatlariga sobit qolmoqda.

Ta’kidlash joizki, qonunlarimizda majburiy mehnatning har qanday shakli va bolalar mehnati taqiqlangan bo‘lib, buning uchun ma’muriy va jinoiy javobgarlik choralari mustahkamlangan.

Xususan, 18 yoshga yetmagan shaxs mehnatidan uning sog‘ligiga va xavfsizligiga ziyon yetkazishi mumkin bo‘lgan ishlarda foydalanish 6 mln. so‘mgacha miqdorda jarima solishga sabab bo‘ladi», deyiladi murojaatda.

Viloyat prokurori mehnatga biror - bir shaklda ma’muriy tarzda majburlaganlik uchun 30 mln. so‘mgacha miqdorda jarima belgilangani ham eslatib o‘tgan. 

«Agarda bunday majburlash voyaga yetmagan shaxsga nisbatan sodir etilgan bo‘lsa, aybdor shaxs jinoiy javobgarlikka tortilib, 60 mln. so‘mgacha jarima yoki uch yilgacha axloq tuzatish ishlari bilan jazolanadi.

Ushbu qonun talablaridan kelib chiqib, hokimlik idoralari, barcha qishloq xo‘jaligi, xalq ta’limi va sog‘liqni saqlashsohasi, davlat idoralari, mulkchilik shaklidan qat’iy nazar korxona va tashkilotlar mansabdor shaxslarini qo‘l ostidagi shaxslarni majburiy mehnatga jalb etganlik yoxud bolalar mehnatiga yo‘l qo‘yganlik uchun javobgarlik to‘g‘risida ogohlantiraman», deya ta’kidlanadi prokuror murojaatida.

Eslatib o‘tamiz, ixtiyoriy ravishda paxta terimiga yollanganlar uchun qo‘lda terilgan 1 kilogramm paxta uchun 1-terimda 1500 so‘mdan, 2-terimda esa 1800 so‘mdan kam bo‘lmagan miqdorda mehnat haqi to‘lash belgilangan.