Tadbirkor Yevgeniy Prigojinning aviahalokatga uchrashiga Kremlning aloqadorligi haqida qator ma’lumotlar yangradi. Holatga Rossiya prezidenti matbuot kotibi Dmitriy Peskov munosabat bildirdi.

Avvalroq, 24 avgust kuni Rossiya prezidenti Vladimir Putin biznesmen samolyotining halokati haqida gapirgandi. U o‘z chiqishida Prigojinni taqdiri og‘ir bo‘lgan iste’dodli inson sifatida tilga oladi.

Peskovning so‘zlariga ko‘ra, Tver viloyatida sodir bo‘lgan aviahalokat bo‘yicha ko‘plab taxminlar paydo bo‘lgan. «Bularning barchasi mutlaqo yolg‘on», deydi u.

Prigojin 23 avgust kuni Embraer biznes-jeti halokatida yana to‘qqiz kishi bilan birga vafot etgandi. Hodisa yuzasidan jinoyat ishi qo‘zg‘atilgan. Tergov Tver viloyatidagi samolyot halokati sabablarining bir nechta versiyalarini ko‘rib chiqmoqda, ular orasida uchuvchi xatosi, texnik muammolar va tashqi ta’sirlar ham bor.

Eslatib o‘tamiz, Prigojinning samolyoti halokatga uchraganiga munosabat bildirgan AQSh prezidenti Jo Bayden ham hodisalar ortida Putin turgani bo‘lishi mumkinligini istisno etmadi.

«Ochig‘i, bundan hayron bo‘lmadim. Rossiyada ortida Putin turmagan hodisalar kamdan-kam ro‘y beradi. Lekin bu borada aniq javob aytishga hali yetarli ma’lumotim yo‘q», – degan J.Bayden. 

Joriy yil 30 iyun kuni Ukraina mudofaa vazirligi Razvedka boshqarmasi boshlig‘i, general-mayor Kirill Budanov Rossiya Federal xavfsizlik xizmati (FXX) Prigojinni yo‘q qilish haqida buyruq olgani, buyruq qachon ijro etilishi  «vaqt masalasi» ekanini ma’lum qilgan edi.

Iyul oyida AQSh Markaziy razvedka boshqarmasi (MRB) direktori Uilyam Byorns Putinning qasos olishi ehtimoli yuqori ekanini ta’kidlab, Prigojin o‘ldirilishi mumkinligiga ishora qilgan edi.