Pokiston va Hindiston o‘rtasida yana keskinlik yuzaga keldi. Kashmirdagi turistlarga qilingan hujumdan so‘ng, Pokiston og‘ir artilleriyasini Hindiston chegarasiga joylashtirdi. Ikki yadro qurolli davlat o‘rtasidagi ziddiyat kuchaymoqda.

Pokiston askarlari bahsli Kashmir mintaqasida Hindiston postlariga o‘q uzganini Hindiston armiyasi tasdiqladi. Bu, seshanba kuni Pahalgamda 26 sayyohni o‘ldirgan hujum ortidan sodir bo‘ldi.

Hindiston Tashqi ishlar kotibi Vikram Misri Pokistonni «transchegaraviy terrorizmni qo‘llab-quvvatlashda» aybladi va barcha Pokiston fuqarolarini 72 soat ichida mamlakatni tark etishga chaqirdi.

Hindiston shuningdek, 1960 yildan buyon amal qilib kelgan Indus daryosi bo‘yicha suv taqsimoti kelishuvini to‘xtatdi. Pokiston bunga javoban buni «urush harakati» deb atab, javobsiz qoldirmasligini bildirdi.

BMT har ikkala tomonning maksimal sabr-toqat bilan yondashishini so‘radi. Shunga qaramay, ikki davlat chegarasida otishmalar davom etmoqda, ammo hozircha talofatlar haqida ma’lumot yo‘q.

Vaziyat tobora murakkablashib borayotgan bir vaqtda, Hindiston armiyasi Kashmirda xavfsizlik bo‘yicha yuqori darajadagi tekshiruv boshladi. Hujumda gumon qilingan shaxslarning uylari buzib tashlandi.

Shuningdek, Pokiston Hindiston fuqarolari uchun vizalarni bekor qilib, o‘z havo hududini Hindiston samolyotlari uchun yopdi.

Ekspertlar ikki davlat o‘rtasida diplomatik aloqalarning yomonlashuvi mintaqadagi tinchlik uchun xavf tug‘dirishini ta’kidlamoqda.