Xitoy O‘zbekistonning yetakchi savdo sheriklaridan biri va O‘zbekiston iqtisodiyotiga yetakchi sarmoyador hisoblanadi.

Iqtisodiy tadqiqotlar va islohotlar markazi tahliliga ko‘ra, so‘nggi yillarda O‘zbekiston va Xitoy o‘rtasidagi savdo-iqtisodiy va sarmoyaviy hamkorlik jadal rivojlanmoqda va hamkorlikning yangi yo‘nalishlarini qamrab olyapti.

Jumladan, 2023-yilda O‘zbekistonning Xitoy bilan tovar ayirboshlash hajmi 51,5 foizga o‘sib, 13,7 milliard dollarni tashkil etdi, eksport 2,5 milliard dollarni, import esa 75,2 foizga o‘sib, 11,3 milliard dollarni tashkil etdi. 2023-yilda Xitoydan importning asosini mashina va uskunalar, sanoat tovarlari va kimyoviy moddalar tashkil qiladi.

O‘tgan yilning 17-oktyabrdagi «Bir kamar, bir yo‘l» tashabbusining 10 yilligi munosabati bilan bo‘lib o‘tgan muzokaralar chog‘ida ikki davlat rahbarlari yaqin 5 yilda tovar ayirboshlash hajmini 20 milliard dollarga yetkazish uchun barcha asoslar mavjudligini o‘zaro kelishib olishgan edi.

Eslatib o‘tamiz, 2023-yil yakunlari bo‘yicha O‘zbekistonning umumiy tashqi savdo aylanmasidagi Xitoyning ulushi 21,9 foizni, umumiy eksport – 10,1 foizni, jami import – 29,5 foizni tashkil etgan.