Qirg‘izistonning Milliy xavfsizlik davlat qo‘mitasi raisi Qamchibek Tashiyev chegarani delimitatsiya qilish bo‘yicha kelishuv tafsilotlari haqida gapirdi.

Jogorku Keneshning Xalqaro ishlar, mudofaa, xavfsizlik va migratsiya qo‘mitasining bugun, 10 oktyabr kuni bo‘lib o‘tgan yig‘ilishida u imzolangan kelishuv natijalariga ko‘ra O‘zbekiston 4485 gektar, Qirg‘iziston esa 19699 gektar yer olganini ma’lum qildi.

Uning Qirg‘izistonga o‘tgan hududlarni sanab o‘tgan. Shu bilan birga, Kampirobod suv ombori ostidagi 4485 gektar maydon rasman O‘zbekistonga o‘tganini qayd etdi.

Suv hajmining gorizontal sathi 908 metrdan 900 metrga tushirilgach, 1246 gektar maydon ozod bo‘ladi, ular Qirg‘izistonga o‘tgan.

«Avvallari Kampirobod to‘g‘onidan faqat O‘zbekiston fuqarolari foydalanishi mumkin edi. Endi qo‘shma boshqaruv bo‘ladi: Qirg‘iziston va O‘zbekistondan to‘rt kishi. 70 yil davomida suvdan foydalanish bo‘yicha qarorni O‘zbekiston mustaqil qabul qilgan. Endi Qirg‘iziston fuqarolari suvdan bepul foydalanish imkoniyatiga ega bo‘ladi: suvni ishlatish, chorva mollarini sug‘orish, hatto baliq ovlash va nasos bilan suv chiqarish imkoniyatiga ega bo‘ladi. O‘zbekiston muhandislik inshootlarini o‘rnata olmaydi», dedi Tashiyev.

«Biz bundan yutdik deb ayta olmayman, lekin bir metrni ham shunchaki bermadik, aksincha, munozarali bo‘lgan maydonlarni oldik. Yaxshi, unumdor yerlar. Hatto oltin ham bor. O‘zbekiston bir vaqtlar oltita litsenziya bergan. Shunga qaramay, biz bu yerlarni oldik», — dedi xavfsizlik qo‘mitasi rahbari.

Shartnoma ratifikatsiya qilinganidan keyin Qirg‘iziston xaritasi 15 806 gektarga kengayishi qayd etilgan.

Eslatib o‘tamiz, avvalroq O‘zbekiston-Qirg‘iziston chegarasi bo‘yicha yangi bayonnoma imzolangani xabar qilingandi.