O‘zbek bokschisi «WBC Silver» kamarini qo‘lga kiritdi
Xabar berganimizdek, Toshkentdagi «O‘zbekiston» sport majmuasida boks bo‘yicha professional janglar tashkil etildi.
Boks oqshomining asosiy jangida ikkinchi o‘rta vazn toifasida yengilmas bokschimiz Azizbek Abdug‘ofurov vakant bo‘lib qolgan «WBC Silver» chempionlik kamari uchun ringga ko‘tarildi. Unga rossiyalik tajribali bokschi Dmitriy Chudinov (21-2-2, KO13) raqiblik qildi.
Ringda ikkinchi raqam ostida harakat qilganiga qaramay, Azizbek raqibini aniq zarbalar bilan qarshi oldi va butun jang davomida ustunlik qildi.
O‘n ikki raundga mo‘ljallangan chempionlik jangi g‘olibi hakamlar bergan ochkolar hisobiga ko‘ra aniqlandi. Hakamlar bir ovozdan 118:110, 118:110, 117:111 hisobida Azizbek Abdug‘ofurov g‘alaba qozonganligini e’tirof etishdi. Shu tarzda hamyurtimiz «WBC Silver» kamari sohibiga aylandi.
Ta’kidlash lozimki, Azizbekning professional ringdagi janglari soni 11taga yetdi va u barchasida g‘alaba qozongan. Shulardan uchtasini muddatidan oldin yakunlagan.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter