Kinematografiya agentligi tomonidan respublika bo‘ylab «Assalom, Navro‘z – yangilanish, mehr-oqibat va qadr-qimmat ayyomi» shiori asosida taniqli kinoijodkorlardan iborat Kinokarvon safarlari o‘tkazilmoqda.

Kinematografiya agentligi va Milliy Kinematografiyani rivojlantirish Markazi bilan hamkorlikda mazkur tadbirlar Qoraqalpog‘iston Respublikasi, viloyatlar va Toshkent shahri hokimliklari ishtirokida aholini madaniy salohiyatini ko‘tarish, a’lo kayfiyat ulashish hamda xotin-qizlar ishtirokini yanada faollashtirib, kinematografiya sohasidagi so‘nggi yangiliklar, yangi kinokartinalar namoyishlari va ijodiy suhbatlar o‘tkaziladi.

Farg‘onada tashkil etilgan tadbirlar davomida viloyatning Marg‘ilon, Quvasoy, Yozyovon, Oltiariq, Toshloq, Rishton, Quva tumanlarida va Farg‘ona shahrida kinoijodkorlarning aholi bilan ijodiy uchrashuvlari tashkil etildi.

Shuningdek, bayram kunlari «Bir kunlik to‘y», «Orzular qanotida», «Hayot afsunlari» badiiy filmlari, «Inson», «Abdulla Oripov», «Matonat maktabi», «Covid-19: sinovli kunlar» kabi hujjatli filmlarning televizion namoyishlari bo‘lib o‘tmoqda.

Shu bilan birga, Agentlik buyurtmasiga binoan suratga olingan rejissyor Jamilaxon Po‘latovaning «Ayol qalbi» kinokartinasining premerasi bo‘lib o‘tdi va ushbu film Respublikamizdagi davlat va xususiy telekanallarda namoyish qilinmoqda. Mazkur filmda tibbiyot sohasida faoliyat olib borayotgan fidoiy shifokorlarning kasbiy faoliyati va taqdiri haqida hikoya qilinadi.

19 mart kuni Navro‘z bayrami oldidan Samarqand viloyati Samarqand shaxridagi «Sharq yulduzi» kinoteatrida rejissyor Ali Hamrayevning «Samarqandda qovun tarovati» badiiy filmi maxsus namoyish etildi.

Kinematografiya agentligi tomonidan oldinda Kinokarvon safarlari Qashqadaryo, Surxondaryo, Xorazm viloyatlari va Qoraqalpog‘iston Respublikasiga bo‘lib o‘tishi rejalashtirilgan.