Taksi haydovchilariga yo‘lovchi tashish faoliyatini olib borishga hali ruxsat berilgani yo‘q, ular faqat yetkazib berish xizmatlarini ko‘rsatishi mumkin, deya xabar bergan IIV YHXBB axborot xizmati.

YPX inspektori Akbar Hakimovning aytishicha 30-aprel kuni Toshkent shahrida Nexia rusumli mashina haydovchisi to‘xtatilganda uning avtomobilida yo‘lovchi ham borligi aniqlangan. Haydovchi yetkazib berish xizmatlarini ko‘rsatish bo‘yicha hujjatlarga ega bo‘lgan, biroq salonda yo‘lovchining borligi karantin qoidalari buzilganini anglatadi.

Videoda haydovchi salondagi yigitning «mazasi bo‘lmagani» iltimos qilgani uchun uni manziliga eltib qo‘yishga rozi bo‘lganini aytadi. Yo‘lovchi ham taksini «Yandeks» ilovasi orqali chaqirgani, o‘zining ishga borib kelishga hujjati borligi, haydovchidan iltimos qilib, uning mashinasiga o‘tirganligini tan olgan.

Vaholanki, karantin qoidalari yumshatilishi sabab, maxsus komissiya qarori asosida yo‘lovchi tashishga ham ruxsat berilgani ma’lum bo‘lgandi.