«GM Uzbekistan» aksiyadorlik jamiyatining Jamoatchilik bilan aloqa qilish xizmati yengil avtomobillar uchun belgilangan 5 foizlik aksiz soliq stavkasiga rasman izoh berdi.

«Mamlakatimizda ishlab chiqarilayotgan avtomobillar narxlarining keskin ko‘tarilishiga yo‘l qo‘ymaslik hamda amaldagi narxlarning saqlanib qolishini ta’minlash maqsadida 2017-yilning 5-sentabrida Vazirlar Mahkamasining «GM Uzbekistan» AJ tomonidan ishlab chiqarilayotgan mahsulotlar narxlarini shakllantirishni takomillashtirish chora-tadbirlari to‘g‘risida»gi 701-sonli qarori imzolandi. Unga ko‘ra, yengil avtomobillarning ulgurji va chakana narxlari O‘zbekiston Respublikasi Markaziy bankining 2017-yil 31-avgustdagi kursi bo‘yicha (4210,35 so‘m) qat’iy belgilab qo‘yildi», deyiladi «GM Uzbekistan»ning Jamoatchilik bilan aloqa qilish xizmati xabarida.

Xabarda qayd etilishicha, valyuta kursining o‘zgarishi «GM Uzbekistan» avtomobillarining Vazirlar Mahkamasining 701-sonli qarori bilan tasdiqlangan ulgurji va chakana narxlar hisob-kitobiga salbiy ta’sir ko‘rsatmasligi uchun «GM Uzbekistan» yengil avtomobillari uchun belgilangan aksiz soliq stavkasi 5 foiz etib belgilandi.

Bu esa kursdagi tafovut sabab xarajatlarning oshib ketishini qoplash va bu bilan avtomobillarning chakana narxlaridagi barqarorlikni ta’minlash imkonini berdi.

«Shunday qilib, O‘zbekiston Respublikasi Prezidenti 2017-yil 29-dekabrda «O‘zbekiston Respublikasining 2018-yilgi asosiy makroiqtisodiy ko‘rsatkichlari prognozi va Davlat budjeti parametrlari to‘g‘risida»gi qarori bilan tasdiqlangan «GM Uzbekistan» avtomobillarining aksiz solig‘ining pasaytirilgan stavkasi 2017-yilning 5-sentabridan amalda qo‘llanib kelinmoqda. O‘z-o‘zidan kelib chiqadiki, aksiz soliq stavkasining o‘zgarishi bilan narxlar tushirilishi ko‘zda tutilmayapti», deyiladi xabarnomada.

Eslatib o‘tish kerak, O‘zbekiston Respublikasi Prezidentining 2017-yil 2-sentabrda imzolangan «Valyuta siyosatini liberallashtirish bo‘yicha birinchi navbatdagi chora-tadbirlari to‘g‘risida»gi PF-5177-sonli farmoniga muvofiq, tovar, ish va xizmatlar uchun narx va tariflar, shuningdek, jamiyatlarning ustav kapitaliga qo‘yiladigan minimal talablar faqat milliy valyutada belgilanishi tasdiqlangan edi.