Istanbuldagi Avliyo Sofiya (Aya-Sofiya) obidasidagi xristian mozaika va freskalari namoz vaqtida pardalar bilan yopib qo‘yiladigan bo‘ldi, deya ma’lum qildi Turkiya prezidenti matbuot kotibi Ibrohim Kalin.

10-iyul kuni mamlakat oliy ma’muriy sudi — Turkiya davlat kengashi 1934-yilda Istanbuldagi Avliyo Sofiya ibodatxonasini muzeyga aylantirish to‘g‘risidagi qarorini bekor qilgani to‘g‘risida xabar bergandik. Shundan keyin Turkiya prezidenti Rajab Toyyib Erdo‘g‘on obidani masjidga aylantirish haqidagi farmonni imzoladi. U yerda 24-iyuldan namoz o‘qish mumkin. Turkiya din ishlari bo‘yicha boshqarmasi namoz vaqtida xristian mozaika va freskalarini yopib qo‘yish yoki qorong‘ilashtirish kerakligini aytgandi.

Aya-Sofiya devoridagi suratlar namoz paytida pardalar bilan yopib qo‘yiladigan bo‘ldi.

«Yorug‘lik tizimi bo‘lmaydi. Hozir freska va mozaikalarni parda bilan yopish ustida ishlayapmiz, u deyarli tayyor. Bino va tasvirlarga hech qanday shikast yetkazmaslik muhim», — dedi Kalin NTV telekanali efirida.

Avliyo Sofiya ibodatxonasi milodiy VI asrda imperator Yustinian buyrug‘iga binoan barpo etilib, 537-yil 27- dekabrda ochilgan. Turklar Konstantinopolni zabt etgach, Vizantiya imperiyasi qulagach, 1453-yilda ibodatxona masjidga aylantirilgan. Biroq 1935-yilda zamonaviy turk davlati asoschisi Mustafo Kamol Otaturk unga muzey maqomini bergan va YuNESKO butunjahon merosi ob’yektlari ro‘yxatiga kiritilgandi.