«Bukhara News» saytida «Buxoro shahar YHXB mas’ulining mas’uliyatsizligi deb haydovchiga ortiqcha jarima yozildi» sarlavhali maqola e’lon qilindi.

Ushbu maqolada o‘z vazifasiga loqaydlik bilan qaraydigan xodimlarning noqonuniy xatti-harakatlarini deb, fuqarolar sarson bo‘lishi, o‘zlarining buzilgan huquqlarini tiklash maqsadida huquqni muhofaza qiluvchi organlarga murojaat qilib, qanchadan-qancha asabi va vaqtini sarflashi kerak, deb savol qo‘yiladi.

Buxoro viloyati IIB ushbu holatni o‘rganib chiqdi va YPX inspektori xatosini tasdiqlagan holda rasmiy ma’lumot berdi.

Qayd etilishicha, 2019-yil 18-aprel kuni viloyat IIB YHXB YPX inspektori tomonidan fuqaro Kamolov Sherzodga nisbatan O‘zbekiston Respublikasi MJtKning 135-moddasi bo‘yicha ma’muriy bayonnoma rasmiylashtirilgan bo‘lib, qaror chiqarishda texnik xatolikka yo‘l qo‘yilgan.

Ya’ni, fuqaro Sh.Kamolov tomonidan MJtKning 135-moddasi 1-qismida ko‘rsatilgan huquqbuzarlik (Transport vositalarini boshqarish huquqini beruvchi hujjatlarsiz boshqarish) sodir etilgan bo‘lsa-da, unga nisbatan MJtKning 135-moddasi 2-qismidagi (Transport vositalarini boshqarish huquqi bo‘lmagan shaxslarning shu vositalarni boshqarishi) huquqbuzarlik uchun ma’muriy jazo tayinlangan.

Hozirda mazkur qaror qayta ko‘rib chiqilib, MJtKning 135-moddasi 1-qismiga asosan qaror chiqarilgan.