Bugun g‘olib aniqlanadi. «Spark» kimga nasib etadi? (foto)
Yoshlar orasida mutolaa muhitini yaratish, kitobxonlik madaniyatini shakllantirish, yoshlarning intellektual bilimlarini va ma’naviy saviyasini oshirish, adabiyotning mo‘’jaz olamiga olib kirish maqsadida 2017-yilning noyabr oyida O‘zbekiston yoshlar ittifoqi «Yosh kitobxon» tanlovini e’lon qilgan edi.
Unda 2 yosh oralig‘ida (14-19 yosh, 20-30 yosh) bo‘lgan yoshlar ishtirok etishi mumkin. Har ikki yosh toifasida 1-o‘rinni qo‘lga kiritgan g‘oliblarga Prezident sovg‘asi — «Spark» avtomashinasi va’da qilingan.
Noyabr-dekabr oylarida tanlovning tuman-shahar hamda hududiy bosqichlari bo‘lib o‘tdi. So‘nggi respublika bosqichida ishtirok etish uchun Qoraqalpog‘iston Respublikasi, viloyatlar va Toshkent shahridan vakillar saralandi.
Rag‘bat sifatida «Spark» avtomashinasi berilishi tanlovning o‘ta shov-shuvli va qizg‘in tus olishiga, saralash bosqichlarining ochiq-oshkora, adolatli o‘tishiga zamin bo‘ldi.
13-fevral kuni final ishtirokchilari 1 dan 20 gacha raqamlar ortida yashiringan ma’naviy-ma’rifiy, tarixiy sohaga oid kitoblarni tanlab, javob berdilar.
14-fevral kuni yoshlar tanlovning ikkinchi «Badiiy kitoblar bilimdoni» sharti bo‘yicha bellashdilar. Bu shartda ishtirokchilar aktyorlar tomonidan ijro etilgan syujetga oid epizod yoki monolog qaysi asardan olingani, mazmun-mohiyati, g‘oyasi va ahamiyatini sharhlab berdilar.
15-fevral kuni ishtirokchilar «Men sevgan adib» sharti bo‘yicha bellashdilar. Monitorda 50 ta raqam ortida yashiringan mumtoz va zamonaviy o‘zbek adabiyoti namoyandalari hamda jahon adabiyoti vakillaridan 4 adabiy siymoni tanlab, ularning hayoti va ijodiga oid ma’lumotlar taqdim etdilar.
Bugun, 16-fevral kuni kitoblardan ma’naviy xazina topgan ishtirokchiga eng oliy sovrin — «Spark» avtomashinasi taqdim etiladi.
OAV xodimlari diqqatiga! MTRK media markazida soat 14:00da to‘rtinchi tur boshlanadi, taqdirlash marosimi soat 16:00 da bo‘ladi. «Yoshlar» kanali jonli efirda beradi. Agar bevosita qatnashmoqchi bo‘lsangiz, ro‘yxatga kiritib qo‘yish kerak. Buning uchun pasport nusxasini +998909278978 raqamiga telegramdan yuborish zarur. Fotoapparat, noutbuk va shu kabi zaruriy jihozlarni olib kirmoqchi bo‘lsangiz, oldindan aytib qo‘ying.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter