AQSh mudofaa vazirligi (Pentagon) ma’lumotlariga ko‘ra, 2017-yilda AQShning dunyo bo‘yicha olib borgan harbiy operatsiyalari chog‘ida 499 nafar begunoh kishi halok bo‘lgan, 169 kishi yaralangan. Bu haqda «Sabah» xabar bermoqda.

Bunga Iroq va Suriyada IShID, Yamanda «al-Qoida», Afg‘onistonda esa «Tolibon» va IShIDga qarshi o‘tkazilgan harbiy operatsiyalar kiradi.

Tramp Oq uyga kelgan yili AQShning Afg‘oniston, Liviya, Suriya, Yaman va Somalidagi hujumlari soni oshgan.

2016-yili 1337 marta hujum uyushtirilgan Afg‘onistonda 2017-yili bu ko‘rsatkich 4361 taga yetdi. 2016-yili Iroq va Suriyada jami 30743 marta hujum uyushtirilgan bo‘lsa,  2017-yilda bu ko‘rsatkich 39577 taga ko‘paydi.

Raqamlar to‘g‘rimi?

Pentagonning bu ma’lumotlari boshqa xalqaro tashkilotlarning ma’lumotlariga to‘g‘ri kelmaydi.

AQSh boshchiligidagi kaolitsiya kuchlari Suriya va Iroqda 2017-yil fevral hamda 2018-yilning fevral oylari mobaynida uyushtirgan harbiy operatsiyalar asnosida jami 640 nafar begunoh fuqaro halok bo‘lgan. Lekin bu raqamni Pentagon 499 qilib ko‘rsatayapti.