Birlashgan Arab Amirliklarida start olgan Osiyo Kubogi sensatsion o‘yinlarga boy bo‘lmoqda.

Dastlab, «A» guruhi vakillari BAA va Bahrayn terma jamoalari musobaqani ochib berishdi.

Mezbon jamoa g‘alabasi taxmin qilingan bahsning 79-daqiqasida bahraynlik Romayhiy gol urib, stadionda yig‘ilgan minglab muxlislarni «shok»ka tushirib qo‘ydi.

88-daqiqaga kelibgina BAA terma jamoasi biroz shubhali penaltidan muvozanatni tiklab, mag‘lubiyatdan qutilib qoldi.

A guruhi, 1-tur

BAA – Bahrayn 1:1

Gollar: Ahmad Xalil (88 pen.) – Romayhiy (79)

«A» guruhining ikkinchi o‘yinida Hindiston syurpriz taqdim etdi.

Guruhda autsayder sanalib kelinayotgan Hindiston terma jamoasi kutilmaganda Tailandni 4:1 hisobida tor-mor etdi.

Bu g‘alabadan so‘ng hindistonliklar guruhda birinchi o‘rinni egallab turibdi. Durang o‘ynagan BAA va Bahrayn ikkinchi va uchinchi o‘rinlarga joylashishgan.

A guruhi, 1-tur

Tailand – Hindiston 1:4

Gollar: Terasil Dangda (33) – Sunil Chhetri (27, 46), Anirudh Thapa (68), Jeje Lalpekhlua (80)

Kecha, 6 yanvar kuni Osiyo Kubogining «B» guruhida ham 1-tur uchrashuvlari bo‘lib o‘tdi.

Bu guruhda ham kutilmagan qayd etildi.

Nafaqat guruhning, balki turnirning favoritlaridan biri sanalgan Avstraliya kutilmaganda Iordaniyaga yengildi.

26-daqiqada Anas Bani Yasin tomonidan bosh bilan urilgan gol uchrashuv taqdirini hal qildi.

B guruhi, 1-tur

Avstraliya – Iordaniya 0:1

Gol: Anas Bani Yasin (26)

«B» guruhining ikkinchi bahsida Suriya va Falastin terma jamoalari o‘zaro bahs olib bordi va bu o‘yinda hisob ochilmadi.

Shu tariqa, «V» guruhida vaziyat quyidagicha tus oldi: 1. Iordaniya (3 ochko); 2. Suriya (1); 3. Falastin (1), 4. Avstraliya (0).

B guruhi, 1-tur

Suriya – Falastin 0:0