Samarqand shahrida «Markaziy Osiyo global iqlim muammolari qarshisida: umumiy farovonlik yo‘lida birlashish» mavzusidagi Xalqaro iqlim forumi ish boshladi.

Tadbir davomida qanday masalalar ko‘rib chiqilishi rejalashtirilgan?

Markaziy Osiyo mamlakatlari rahbarlari, Yevropa Ittifoqi rahbariyati, BMT va boshqa xalqaro tashkilotlar vakillari va ekspertlar, olimlar, faollar  ishtirok etayotgan forumda iqlim xavflari va ekologik tahdidlarning oldini olish borasidagi harakatlar muvofiqlashtirilishi kutilmoqda.

Markaziy Osiyoga xavf qanday?

Tadbirda ta’kidlanganishicha, Markaziy Osiyoda iqlim isishi ko‘rsatkichi dunyodagiga qaraganda 2 barobar tezroq sodir bo‘lmoqda. Suv zaxiralari kamayib bormoqda, abadiy muzliklar qisqaryapti, tuproq zaiflashib, hosildorlik pasayib bormoqda. Bu holat o‘z navbatida aholining kundalik hayotiga ta’sir ko‘rsatib boryapti.

O‘zbekiston ushbu xavflarga bugundanoq teran nazar tashlamoqda va ekologiyani saqlash uchun bir qator chora-tadbirlar amalga oshirilyapti. Xususan, tadbir ishtirokchilari tomonidan Orol dengizining qurigan tubini yashillashtirish borasida amalga oshirilayotgan ishlar olqishlab o‘tildi.

Ammo bu yetarlimi? Yana qanday ishlarni jadallashtirish lozim? Tadbirda shu haqda gap ketdi.

«Yashil» iqtisodiyotga o‘tish

Yashil iqtisodiyot – insonning resurslarga nisbatan mas’uliyatli munosabatini nazarda tutuvchi iqtisodiy rivojlanish modelidir. U iqtisodiy o‘sish va tabiiy boyliklarni saqlab qolish o‘rtasidagi oqilona murosani topishga qaratilgan.

Bugun yer osti va yer usti boyliklari orqa-oldiga qaramasdan, pala-partish sarflanadigan bo‘lsa, yaqin kelajakda katta muammolar yuzaga kelishi turgan gap. Forum davomida yashil iqtisodiyot bo‘yicha bir qator fikrlar almashilmoqda.

Barqaror shahar rivojlanishi

Shaharlarning barqaror rivojlanishi – ekologik muvozanatga erishishda muhim ahamiyat kasb etadi. Bugungi kunda shahar muammolarini hal qilish, shaharliklarning turmush sharoitlari va hayot sifatini yaxshilashda tabiat resurslaridan o‘rinli foydalanish katta ahamiyatga ega.

Suv resurslarini birgalikda boshqarish

Markaziy Osiyoning eng katta muammolaridan biri - suv yetishmovchiligidir. Bu muammo yaqin yillarda yanada keskinlashishi kutilmoqda.

Bu jarayondan faqatgina birgalikda ishlash orqali chiqib ketish mumkin. Forum davomida aynan shunday maqsadlar ilgari suriladi.

Ekologik toza energetikani rivojlantirish

O‘zbekiston bu borada oldinga juda katta qadam tashladi. 2030 yilga borib yurtimizda yashil energetikaning ulushini 54 foizga yetkazish maqsad qilingan.

Yurtimizda joriy yil «Atrof-muhitni muhofaza qilish va «yashil» iqtisodiyot yili» deb e’lon qilingani ham bejiz emas.

Yoshlar, ilm-fan va iqlim

Yoshlar – jamiyatning eng faol va harakatchan qatlami. Ular yangi g‘oyalarga ochiq, innovatsion yechimlarni izlashga tayyor va kelajakka katta umid bilan qarashadi.

Forum davomida iqlim o‘zgarishi muammosini hal qilish uchun yoshlar va ilm-fan birgalikda harakat qilishlari kerakligi ta’kidlandi.

Xabar.uz muxbiri