Qiziltog‘ shaharchasi aholisini turmushini yaxshilash, munosib shart-sharoitlar yaratish, ijtimoiy va ishlab chiqarish soha ob’yektlar infratuzilmasini rivojlantirish uchun 267 milliard 512 million so‘m mablag‘ ajratiladi. Bu haqda Toshkent viloyat hokimligi xabar berdi.

Ayni kunlarda mablag‘ning bir qismi - 48 milliard so‘mdan ziyod mablag‘lar sarf etildi.

Jumladan:

– O‘zbekiston futbol Assotsiatsiyasiga qarashli «Futbol» o‘yingohi va yotoqxona binosi mukammal ta’mirlandi;

– Shaharcha shifoxonasi uchun 19 turdagi zamonaviy tibbiy asbob-uskunalar bilan jihozlanib, aholiga sifatli xizmat ko‘rsatish uchun tunu-kun faoliyat olib boradigan 5 nafar malakali mutaxassislardan iborat shifokorlik posti yo‘lga qo‘yildi. Shu bilan bir qatorda, tibbiy tez yordam xizmatini yaxshilash maqsadida 1 dona “tez yordam” mashinasi xarid qilindi;

– 56-maktab to‘liq rekonstruksiya qilindi. 55-maktabning kanalizatsiya tizimi qayta ta’mirlanib, elektron doskalar bilan jihozlandi. 57-umumta’lim maktabi va mahalla yoshlari uchun yangi futbol maydoni foydalanishga topshirildi;

– Oydin mahallasida 1 ta vorkaut va stritbol, Said ota mahallasida esa 1 ta universal sport maydoni qurildi;

– 4-kasbiylashgan yong‘in qutqaruv qismi kapital ta’mirlanib, qo‘shimcha bino va bitta o‘t o‘chirish avtotransport vositasi bilan ta’minlandi;

– Hududdagi istirohat bog‘i zamonaviy ko‘rinishga keltirildi. Shuningdek, ko‘p qavatli uy-joylarning fasad, tom qismlari, yo‘laklari va 2 ta bolalar maydonchasi barpo etildi;

–7 km. umumfoydalanuvdagi, 14,2 km. ichki yo‘llarda ta’mirlash ishlari, piyodalar yo‘laklari qurib bitkazildi. Oqova suv lotoklari va bordyurlar o‘rnatildi;

–10,2 km ichimlik suv tarmoqlari tortilib, suv inshooti va suv nasoslari yangisiga almashtirildi. 200 dan ortiq eskirgan sim yog‘ochi yangisiga almashtirilib, tarmoqlar yangilandi.