O‘zbekistonda Milliy uglerodli kredit tizimini yaratish doirasida «Industrial Innovation Group» kompaniyasi bilan anglashuv memorandumi imzolandi, deb xabar bermoqda Ekologiya, atrof-muhitni muhofaza qilish va iqlim o‘zgarishi vazirligi.

Kelishuvga ko‘ra, «Industrial Innovation Group» kompaniyasi O‘zbekistonda atmosferaga chiqarilayotgan gazlarni hisobga olish bo‘yicha milliy reyestrni yaratishda ishtirok etadi.

Memorandum O‘zbekistonning tashlanmalarni kamaytirish bo‘yicha milliy strategiyasiga muvofiq tuzilgan. Bunga qadar Ekologiya, atrof-muhitni muhofaza qilish va iqlim o‘zgarishi vazirligi atmosferaga chiqarilayotgan gazlarni hisobga olish bo‘yicha milliy reyestrni yaratish tashabbusi bilan chiqqandi.

Uchrashuvda Aziz Abduhakimov reyestrning yaratilishi iqlim o‘zgarishi muammosini hal etishda samarali yondashuv ekanligini, mavjud tashlanmalarni tartibga solish  va kamaytirish bo‘yicha loyihalarni rag‘batlantirish tizimlarini integratsiyalashda muhim ahamiyat kasb etishini ta’kidlagan.

Qayd etilishicha, O‘zbekistonning birgalikdagi tashlanmalar inventarizatsiyasi mamlakatning ekologik izlarini to‘g‘ri baholash va uglerodni nazorat qilish tashabbuslari asosini ishlab chiqish uchun ishonchli yondashuv hisoblanadi. Reyestr tashlanmalarni muntazam ravishda kuzatib borish va uglerod xavfini kamaytirish loyihalarini aniq baholashi mumkin bo‘lgan keng qamrovli platforma bo‘lib xizmat qiladigan muhim havolani yaratadi.

«Industrial Innovation Group» – bosh qarorgohi BAAda joylashgan transmilliy kompaniyalar guruhi. U murakkab, yuqori texnologiyali tizimlarni yaratish, yirik sanoat va innovatsion majmualarni loyihalash va qurish bo‘yicha 30 yillik katta tajribaga ega.

Tashkilot turli biznes tarmoqlari uchun barqaror yo‘llarni ishlab chiqadi, uglerod xavfini kamaytirish tashabbuslarini konseptuallashtiradi, turli uglerod kredit registrlari uchun dizayn hujjatlarini yaratadi, shuningdek, u «Hemporama Biochar» nomi bilan tanilgan bioko‘mirning global ishlab chiqaruvchisi hisoblanadi.