«O‘zbekkino» Milliy agentligi buyurtmasiga binoan «Inson» kinostudiyasi tomonidan «Yo‘lbarsning tug‘ilishi» nomli qisqa metrajli filmning tasvirga olish ishlari boshlandi.

Film ssenariysi taniqli adib Xayriddin Sultonovning shu nomli hikoyasi asosida yaratilgan. Mazkur film temuriyzoda Zahiriddinning tug‘ilishi va unga Bobur ismining berilishi ilohiy sabablari haqida. Umarshayx Mirzoning o‘g‘il farzand ko‘rish orzusi va Bobur Mirzoning dunyoga kelishi bilan bog‘liq tarixiy voqealar filmda badiiy to‘qimalar yordamida ochib beriladi.

«Yo‘lbarsning tug‘ilishi» tarixiy-badiiy filmida Elbek Fayziyev, Boir Xolmirzayev, Tamara Hazratqulova, Marjona O‘ljayeva, Ma’ruf Otajonov, Madina Odilova, Daler Timurov, Abdurahmon Ochilov kabi aktyorlar rol ijro qilmoqda.

Ssenariy muallifi va postanovkachi rejissyor Bobur Sher o‘g‘li, postanovkachi operator Hasan Atabayev, ikkinchi rejissyor Bahriddin Aynazarov, postanovkachi rassom Sa’nat  Kenjayev, liboslar bo‘yicha rassom Sevara Zununova, grim ustasi Galina Geydelbax, film direktori Fayzirahmon Usmonov.