Termizda o‘tayotgan Xalqaro baxshichilik san’ati festivalida Andijon viloyati uchun ajratilgan maydon mehmonlar bilan gavjum. Biri-biriga o‘xshamaydigan dasturlar kishini o‘ziga jalb qiladi. Ayniqsa, «Andijon polkasi» yangraganida tumonot odam raqsga tushishni boshlab yuboradi.

— Baxshichilik festivalini Termizda o‘tkazilayotgani bizga katta zavq-shavq bag‘ishladi, — deydi Qumqo‘rg‘ondan kelgan Dono Obidova. — Turli viloyatlarning urf-odat, an’ana va san’ati bilan yaqindan tanishish imkoniyatiga ega bo‘lyapmiz. Ayniqsa andijonliklar yaratgan dekoratsiya ishlari, qo‘shiqchilar, sozandalarning chiqishlari o‘zgacha.

— «Andijon polka» kuyi, «Anjanchasiga» qo‘shiqlarini eshitganda boshqacha bo‘lib ketaman, — deya suhbatga qo‘shildi mezbon shahar vakili Ibrohim Safarov. — Chunki, mehmondo‘st Andijon viloyatida ko‘p bo‘lganman. Samimiy, mehnatkash, bir so‘zli chapani insonlarning fe’l-atvorlari shu kuyda mujassam ekanligini his etaman.

«Cho‘ntak» choyxonasi esa andijonlik mashhur oshpazlar tomonidan damlangan devzira guruchidan osh va xushbo‘y ko‘k choyi bilan mashhur. Bu joy ham shinavandalari bilan gavjum.