Bugun, 23-oktyabr O‘zbekiston Respublikasi Ichki ishlar vazirligining migratsiya va fuqarolikni rasmiylashtirish bosh boshqarmasi rasmiylari tomonidan jurnalist Bobomurod Abdullayevga xorijga chiqish pasporti topshirilgan. Bu haqda Kun.uz xabar berdi.

Xabarda ta’kidlanishicha, jurnalistga nisbatan barcha tergov va surishtiruvlar tugatilgani, sud ishi ham yakunlangani, endi unga oid O‘zbekiston ichida va xorijga chiqish bilan bog‘liq har qanday cheklovlar bekor qilingan. 

Bobomurod Abdullayev tarixi

Eslatib o‘tamiz, bir necha kun avval jurnalistning o‘zi «Facebook»dagi sahifasi orqali prezident Shavkat Mirziyoyev unga barcha qulayliklarga ega uch xonali uy sovg‘a qilganini bildirgandi.

Bobomurod Abdullayev ilk bora «Usmon Haqnazarov» nomi ostida maqolalar yozishda ayblanib qo‘lga olingan, 2018-yil may oyida ozodlikka chiqarilgandi.

Lekin shu yil yozda Bishkekda tahsil olishda bo‘lib turgan Abdullayev bu safar «Qora Mergan» nomi ostida maqolalar yozishda gumonlanib, O‘zbekistonga keltirildi.

Jurnalistning onasi prezidentga videomurojaat yo‘llagach, undan tilxat olinib, ozod etilgan.