Bugun O‘zbekiston Respublikasi Oliy Majlisi Senati Kengashi va Qonunchilik palatasi Kengashining majlisi bo‘lib o‘tdi. Unda Oliy Majlis palatalari Kengashlari a’zolari, deputatlar, senatorlar, vazirlik va idoralar mutasaddi rahbarlari, jamoat tashkilotlari va ommaviy axborot vositalari xodimlari ishtirok etgani haqida xabar bergan edik. Xabar.uz muxbiri to‘y-hashamlar, oilaviy tantanalar, ma’raka va marosimlar, marhumlarning xotirasiga bag‘ishlangan tadbirlarni o‘tkazish tartibi to‘g‘risidagi nizomga oid o‘zgarishlarni ma’lum qildi.

Unga ko‘ra endi to‘ylarda 2 san’atkor (guruh) ishtirok etishiga ruxsat beriladi. To‘y korteji esa 3 mashinadan oshmasligi kerak.

Yangi nizom bo‘yicha oilaviy tadbirlar faqat bir kun, soat 06:00dan 23:00 oralig‘ida o‘tkaziladi. Dafn etish marosimi bundan mustasno. Oilaviy tadbirlarda 200 nafargacha, osh berish marosimida 250 nafargacha kishi qatnashadi. Qo‘shaloq to‘yda 250 va u bilan bog‘liq osh berish marosimida 300 nafargacha kishi qatnashishi mumkin.

Endi to‘ylarda, kortejda 3 tadan ko‘p mashinaga ruxsat berilmaydi. Pulli avtotransport xizmati esa litsenziyaga ega bo‘lishi shart. Diniy marosimlarda, diniy mavzuda ma’ruza ko‘zda tutilgan bo‘lsa, ma’ruzani din idorasining vakolatli vakili o‘qiydi. Ortiqcha xarajat talab etiladigan oilaviy tadbirlardan oldingi va keyingi qo‘shimcha «kelin navkari», «charlar», «quda chaqirdi», «kuyov chaqirdi», «kelin chaqirdi», «tog‘ora yuborish», «ota ko‘rdi» kabi rasm-rusmlarni o‘tkazish taqiqlanadi.

Shuningdek dafn etish va motam marosimlari bilan bog‘liq «yetti», «payshanbalik», «yigirma», «qirq», «hayit», «yil oshi», «mato ulashish» kabi rasm-rusmlarni o‘tkazishga ruxsat berilmaydi. Tadbirda ikki nafardan ortiq xonanda yoki guruh ishtirok etishiga yo‘l qo‘yilmaydi. Ushbu nizom 2020 yil 1 yanvardan kuchga kiradi.