Qattiq xurrak otish xavfli kasallik belgisi bo‘lishi mumkin.

Uyqu apnoe sindromi dunyo aholisi o‘rtasida keng tarqalgan kasallik bo‘lib, bugungi kunda 1 milliardan ortiq kishi ushbu xastalikka chalingan. Cindrom obstruktiv yoki markaziy bo‘lishi mumkin. Kasallik asosan semizlik, tomoq, burun kasalliklari tufayli kelib chiqadi. 

Uyqu paytida qattiq xurrak otish, nafas siqilishi xastalikning asosiy belgilari hisoblanadi. Bundan tashqari, tunda uyquning tez-tez buzilishi tufayli ushbu xastalikka chalingan insonlar kunduzi o‘zini holsiz va asabiy his qiladi.

Bemorga aniq tashxis qo‘yish uchun polisomnografiya (PSG) tekshiruvi o‘tkazilib, maxsus uskuna yordamida insonning uyqu paytidagi fiziologik ko‘rsatkichlari qayd etiladi.

Uyqu apnoe sindromini davolash usuli uni keltirib chiqargan sabablarga qarab tanlanadi. Amaliyotda asosan doimiy musbat havo bosimini beruvchi maxsus qurilma qo‘llaniladi. Bu qurilma nafas yo‘llarini ochiq saqlashga yordam beradi va uxlash vaqtida ular to‘silib qolishining oldini oladi.

Ayrim hollarda nafas olish yo‘llarida jarrohlik amaliyotini bajarish yoki elektrostimulyasiya muolajasini o‘tkazish zarurati tug‘ilishi mumkin.

Uyqu apnoe sindromini o‘z vaqtida davolamasa, yurak-qon tomir kasalliklari, gipertoniya, diabetga chalinish xavfi ortadi, xotira va diqqat-e’tibor susayadi.

Kasallik profilaktikasi uchun bir qancha tavsiyalarga rioya qilish lozim. Xususan, sog‘lom turmush tarzi, zararli odatlardan voz kechish, jismoniy faollik uyqu apnoe sindromiga chalinish xavfini bir necha barobarga kamaytiradi.