Jahon tajribasidan ma’lumki, xizmat ko‘rsatish sohasida kam xarajat bilan tez muddatda biznesni yo‘lga qo‘yish, daromadlarining real o‘sishini ta’minlash hamda yangi ish o‘rinlarini boshqa tarmoqlarga nisbatan ko‘proq tashkil etish mumkin.

Yangi O‘zbekistonning iqtisodiy rivojlanish bosqichida xizmatlar sohasini jadal rivojlantirishga alohida e’tibor qaratilmoqda.

Jumladan, 2022 yilda qabul qilingan «Xizmatlar sohasini qo‘llab-quvvatlashga oid qo‘shimcha chora-tadbirlar to‘g‘risida»gi Prezident qarori sohada kichik korxonalar va mikrofirmalarni imtiyozli kreditlash, imtiyozli soliq stavkalarini joriy etish, yangicha xizmat turlarini tashkil etish yuzasidan infrastrukturalarni yaxshilash hamda tadbirkorlarni moliyaviy qo‘llab-quvvatlash orqali xizmatlar xajmini yanada kengaytirish uchun rag‘bat bo‘lmoqda.

Olib borilgan chora-tadbirlar natijasida yalpi ichki mahsulot hajmi joriy yilning I yilligida 469,6 trln. so‘mni tashkil etib, o‘tgan yilning mos davriga nisbatan 5,6 foizga o‘sdi.

2023 yilning yanvar-iyun oylari yakunlariga ko‘ra, YaIM tarkibida katta bo‘lmagan o‘zgarishlar kuzatilgan bo‘lsada, YaIM (YaQQ) tarkibida xizmatlar sohasining ulushi 44,1 % dan 47,1 % ga oshganini ko‘rishimiz mumkin.

YaIMning boshqa tarmoqariga nazar tashlaydigan bo‘lsak, jumladan, qishloq, o‘rmon va baliqchilik xo‘jaligining ulushi 20,9 % dan 20,1 % ga, sanoatning ulushi 28,0 % dan 26,3 % ga, qurilish tarmog‘ining ulushi 7,0 % dan 6,5 % ga kamaydi.

Ushbu YaIMda tarmoqlarning yalpi qo‘shilgan qiymatlarining hajmi 444,4 trln.so‘m bo‘lib, tarmoqlar kesimida quyidagicha ulushni tashkil etadi:

Yuqoridagi raqamlarga asosan, iqtisodiy faoliyat turlari bo‘yicha YaIMda eng yuqori ulush xizmatlar sohasida o‘z ifodasini topmoqda.

Joriy yilning o‘tgan 8 oyida tarmoqlar kesimidagi o‘sish ko‘rsatkichlari 2022 yilning mos davriga nisbatan o‘zgarishlari quyidagicha aks etgan:

- xizmat ko‘rsatish sohasi + 58,7 trln.so‘mga;
- qishloq, o‘rmon va baliqchilik xo‘jaligi + 12,9 trln.so‘mga;
- sanoat sohasi + 12,6 trln.so‘mga;
- qurilish sohasi + 3,3 trln.so‘mga oshgan.

Iqtisodiy tarmoqlarda xizmatlar sohasining o‘sish sur’ati yuqori bo‘lganligi sababli, ushbu sohadagi o‘zgarishlar hamda rivojlanishlar kelgusida ham yanada o‘sishi prognoz qilinmoqda.

Xizmatlar sohasi o‘sish tendensiyasi-davlat tomonidan yaratilayotgan imkoniyat va sharoitlardan oqilona foydalanish bilan birgalikda, sohaga keng qamrovda tadbirkorlarni jalb qilish va bu orqali aholi bandligini ta’minlash kabi muhim ahamiyat kasb etuvchi omillar yotadi.

Shuningdek, joriy yilning yanvar-avgust oylarida xizmatlar sohasida 40 168 ta (2022 yilning yanvar-avgust oylariga nisbatan 2 244 taga ko‘p tashkil etilgan) kichik biznes sub’yektlari tashkil etilib, 1 sentyabr holatiga ushbu sohada faoliyat ko‘rsatayotgan korxona va tashkilotlar soni 336 613 taga yetdi.

Respublikamizda joriy yilning o‘tgan 8 oyida xizmatlar hajmi 288,4 trln. so‘mni tashkil etib, o‘tgan yilning mos davriga nisbatan 112,5 foizga, aholi jon boshiga ko‘rsatilgan xizmatlar hajmi esa 110,1 foizga o‘sib, 7,9 mln. so‘mga yetgan.

Bugungi kunda, mamlakatimizda faoliyat yuritayotgan korxonalarning 70,4 foizi xizmatlar sohasiga to‘g‘ri kelmoqda hamda jami band bo‘lgan aholining 55 foizidan ortig‘i xizmatlar sohasida ishlab kelishmoqda.

Toshkent shahrida xizmatlar sohasini rivojlantirish bo‘yicha tegishli choralarni ko‘rish maqsadida Toshkent shahar hokimligi «O‘zmilliybank» AJ bilan birgalikda mas’ul etib belgilangan so‘ng, amalga oshirilgan chora-tadbirlar natijasida quyidagilarga erishildi.

Jumladan, 2023 yilning 8 oyligida korxona va tashkilotlar tomonidan jami 116,8 trln.so‘mlik xizmatlar ko‘rsatildi. O‘tgan yilning mos davrida ushbu ko‘rsatkich 89,3 trln.so‘mni, davriy o‘sish esa 18,2 foizni tashkil etdi.

Shuningdek, xizmatlar sohasida moliya, aloqa va axborotlashtirish, ta’lim va transport xizmatlaridagi o‘zgarishlar boshqa turdagi xizmatlarga nisbatan yuqori o‘sish bo‘yicha natijalarni qayd etgan.

Misol uchun, quyidagi diagrammalarda bir necha yillik o‘sish tendensiyalari bilan yuqori o‘sishni qayd etgan xizmatlarni ko‘rishimiz mumkin:



Toshkent shahrida xizmatlar sohasi xajmining jadal sur’atlar bilan o‘sishining kuzatilishi amalga oshirilgan ishlar hamda avvaldan belgilab olingan chora-tadbirlar natijasi sifatida ko‘rish mumkin.

Bu borada, davlat rahbarining topshirig‘i ijrosini ta’minlash maqsadida Toshkent shahar hokimligi «O‘zmilliybank» AJ bilan hamkorlikda rejali ishlarni amaliyotda to‘g‘ri tadbiq qilinayotganligining belgisidir.

Aytish joizki, 2021 yildan bugungi kunga qadar sohada yangi loyihalarni tashkil etish, faoliyatini kengaytirish hamda ularni moliyaviy qo‘llab-quvvatlash maqsadida «O‘zmilliybank» AJ tijorat banklari bilan birgalikda 28 mingdan ziyod tadbirkorlar uchun 50,4 trln.so‘m, shundan joriy yilning 8 oyida 6,4 mingta tadbirkorlarga esa 13,3 trln.so‘mlik kredit mablag‘larni yo‘naltirildi.

Buning natijasida, 2023 yil 1 sentyabr holatiga ko‘ra, 28,4 mingta yangi tadbirkorlik sub’yektlari tashkil etilib, ushbu sohada faoliyat yuritayotgan korxona va tashkilotlar soni 76 mingtaga yetdi.

Umuman olganda, 2021 yildan bugungi kunga qadar korxona va tashkilotlar tomonidan jami 357 trln. so‘mlik xizmatlar ko‘rsatildi, xizmatlar hajmi esa 2020 yilga nisbatan 2 barobarga o‘sdi.

Xulosa qilib aytganda, xizmatlar xajmining o‘tgan yillarga nisbatan jadal o‘sib borishi aholi jon boshiga ko‘rsatilgan xizmatlar xajmining yuqori o‘sishishiga hamda aholi daromadlarining ko‘payishiga sabab bo‘lmoqda.

Shu bilan birga, Toshkent shahrida 2023 yilda xizmatlar sohasini rivojlantirish orqali jumladan, yangi tadbirkorlarni joriy qilish, loyihalarni to‘liq ishga tushirilishi, mavjud tadbirkorlar faoliyatini yanada kengaytirish, korxonalar faolitini rasmiy sektorga o‘tkazilishini ta’minlash hamda soha yo‘nalishlarida fuqarolarni o‘zini o‘zi band qilish orqali jami 445 mingta ish o‘rinlarini yaratilishi ko‘zda tutilgan.

Shu munosabat bilan, o‘tgan 8 oy davomida yuqorida ko‘rsatib o‘tilgan yo‘nalishlar bo‘yicha amalga oshirilgan chora-tadbirlar natijasida xizmatlar sohasida 290 mingta ish o‘rinlarini yaratilganligi ijobiy natijalardan biridir.

Shuningdek, 2022 yil yakuni bilan aholi jon boshiga ko‘rsatilgan xizmatlar xajmi 47 mln. so‘mni tashkil etgan, ushbu ko‘rsatkich joriy yil yakuni bilan 57 mln. so‘mga yetkazilib, 2020 yilga nisbatan 3 barobarga ko‘payishi prognoz qilingan.

O‘zbekiston Respublikasi Prezidenti tomonidan belgilab berilgan vazifa va topshiriqlarning ijrosini mas’ullar tomonidan o‘z vaqtida samarali bajarilishi orqali maqsadli parametr ko‘rsatkichlariga erishish natijasida aholi bandligini ta’minlash bilan bir qatorda, yangi xizmat turlarini joriy qilish, shuningdek aholi jon boshiga ko‘rsatiladigan xizmatlar hajmini hamda tadbirkorlik sub’yektlarining sonini oshishiga sabab bo‘lmoqda.

Bu orqali jamiyatimizning yashash tarzi yaxshilanib, ularning turmush darajasiga ijobiy ta’sir ko‘rsatish maqsad qilingan.