«Yaqinda Toshkent shahrida avtobus kanalga tushib ketgan edi. Ushbu holatda sug‘urta kompaniyasi qancha miqdorda sug‘urta tovonini to‘laydi?».

Savolga «O‘zagrosug‘urta» aksiyadorlik jamiyati Yuridik departament boshlig‘i Ilhom Eshonqulov javob berdi:

— Vazirlar Mahkamasining 2015-yil 15-sentabrdagi 266-son «Tashuvchining fuqarolik javobgarligini majburiy sug‘urta qilish to‘g‘risida»gi O‘zbekiston Respublikasi qonunini amalga oshirish chora-tadbirlari haqida»gi qarori bilan tasdiqlangan «Tashuvchining fuqarolik javobgarligini majburiy sug‘urta qilish qoidalari»ga asosan, «Tashuvchining fuqarolik javobgarligini majburiy sug‘urta qilish shartnomasi»ga ko‘ra shartnoma amal qilish davrida yo‘lovchilarning hayoti, sog‘lig‘i va (yoki) mol-mulkiga zarar yetkazilganligi uchun tashuvchining fuqarolik javobgarligi yuzaga kelganligi belgilangan tartibda tasdiqlanganda sug‘urta puli (olingan javobgarlik summasi) doirasida zararning o‘rni qoplanadi.

Vazirlar Mahkamasining 2008-yil 24-iyundagi «Transport vositalari egalarining fuqarolik javobgarligini majburiy sug‘urta qilish to‘g‘risida»gi O‘zbekiston Respublikasi qonunini amalga oshirish chora-tadbirlari haqida»gi qarori bilan tasdiqlangan «Transport vositalari egalarining fuqarolik javobgarligini majburiy sug‘urta qilish qoidalari»ga asosan, jabrlanuvchilar (yo‘lovchilar)ning hayoti yoki sog‘lig‘iga zarar yetkazilganda sug‘urta tovonining miqdori sug‘urta pulining 65 foizigacha bo‘lgan miqdorda zarar qoplab beriladi.

Shuningdek, transport vositasi boshqa shartlarda ixtiyoriy sug‘urta shartnomasiga asosan sug‘urtalangan bo‘lsa, baxtsiz hodisada jabrlangan yo‘lovchilarning hayoti, sog‘lig‘i va (yoki) mol-mulkiga yetkazilgan zararni qoplash bilan birgalikda, mazkur transport vositasining o‘ziga yetkazilgan zarar ham olingan javobgarlikka mutanosib ravishda qoplanadi.