Ijtimoiy tarmoqlarda yo‘l-patrul xizmati xodimi va haydovchi o‘rtasidagi mojaro aks etgan video tarqaldi. Unda YPX xodimining haydovchiga qo‘l ko‘targani ko‘rinadi.

Mazkur holat yuzasidan poytaxt IIBB quyidagilarni ma’lum qildi.

«Joriy yilning 7-oktyabr kuni taxminan soat 07.30 dan Toshkent shahar IIBB YHXB inspektori B.Nazirxo‘jayev Shayxontohur tumanidagi Bunyodkor va Islom Karimov ko‘chalari chorrahasida tirbandlikni bartaraf etish maqsadida harakatni tartibga solib turgan.

Biroq soat 08.30 larda davlat raqami 01 J 055 XA bo‘lgan «Lasetti» rusumli transport vositasi haydovchisi 1984 yilda tug‘ilgan E.A. uyali telefondan foydalanib, YPX inspektorining ishorasiga bo‘ysunmasdan chorrahaga kirib kelgan.

YPX inspektori haydovchiga sodir etgan qoidabuzarligini tushuntirayotgan vaqtida haydovchi YPX inspektorini onasini haqorat qilgan, natijada o‘zaro tortishuv yuzaga kelgan. Haydovchining harakatlariga huquqiy baho berish maqsadida Shayxontohur tumani IIO FMB tomonidan tergovga qadar tekshiruv o‘tkazilmoqda.

YPX inspektorining xatti-harakatlari yuzasidan Toshkent shahar IIBB tomonidan xizmat tekshiruvi o‘tkazilmoqda. Yakuni bo‘yicha qonuniy qaror qabul qilinishi ta’minlanadi», deyiladi rasmiy xabarda.