Sirdaryo viloyatining suv bosgan hududlarida favqulodda vaziyatlarning oqibatlarini bartaraf etish ishlari davom ettirilmoqda. Xususan, ushbu hududdagi qabristonlar, kanalizatsiya tizimlari, suv tozalash inshootlari chuqur o‘rganilmoqda. Shu bilan bir qatorda mazkur ob’yektlarda dezinfeksiya ishlari amalga oshirilmoqda. Bu haqda FVV axborot xizmati xabar berdi.

Sanitariya-epidemiologiya hamda farovonlikni ta’minlash maqsadida suv qurigan hududlarda dezinfeksiya ishlari boshlab yuborilgan. Ayni vaqtda Oqoltin tumanidagi «Ahillik» qishlog‘i, o‘sha tumanning «Qo‘rg‘ontepa» va «Sardoba» qishloqlari va Mirzaobod tumanidagi «Baliqchilik qishlog‘i» qayta ishlanadi.

Zararlangan hududlarda nobud bo‘lgan 70 ta uy hayvoni sanitariya qoidalariga muvofiq ko‘milgan.

Yong‘in o‘chirish mashinalari va motopompalar bilan toshqin suvlarini tortib olish ishlari davom etmoqda.

Favqulodda vaziyatlar, Mudofaa vazirliklari va Milliy gvardiya xodimlari hududlarni to‘plangan qoldiqlardan tozalash tadbirlarini olib borishyapti.

1 maydan boshlab Favqulodda vaziyatlar vazirligida «1205» tezkor aloqa raqamining faoliyati yo‘lga qo‘yilgan edi. Ayni vaqtgacha ishonch telefoniga 5 609 qo‘ng‘iroq kelib tushgan. Shulardan 4861 nafar fuqaro favqulodda vaziyat oqibatlari bo‘yicha ma’lumotlar so‘rab, murojaat etgan. Shuningdek, ularning 287 nafari oziq-ovqat va boshqa zarur mahsulotlar masalasida yordam so‘ragan. E’tiborlisi, murojaatchilardan 199 nafari ko‘ngilli qutqaruvchi sifatida favqulodda vaziyat o‘chog‘iga borish istagini ma’lum qilgan.

O‘zbekiston Respublikasi prezidenti har kuni Sirdaryo viloyatining zarar ko‘rgan hududlariga tashrif buyurib, suv toshqini oqibatlarini bartaraf etishni shaxsan nazoratga olgan holda, hukumat komissiyasi a’zolariga barcha muammolarni tezkorlik bilan hal etish bo‘yicha yangi vazifalarni yuklamoqda.