Toshkentda er-xotin o‘zlarining bir yoshli farzandini 5000 AQSh dollarga sotmoqchi bo‘lishdi. Bu haqda «Markaziy studiya» ko‘rsatuvida ma’lum qilingan.

«Menga Alisa qo‘ng‘iroq qilib, ko‘rishishni taklif qildi. Biz ko‘rishdik va u meni farzandimni asrab olmoqchi ekanligini bildirdi. Men esa unga turmush o‘rtog‘im bilan gaplashib olishim kerakligini aytdim. Erim rad javobini berdi. Keyin u bizga 5000 dollar pul taklif qildi. O‘ylab ko‘rib, uning qanday sharoitda yashashi bilan tanishgach biz rozi bo‘ldik», — deydi bolaning onasi.

Aytib o‘tilishicha er-xotinlar ikkalasi ham mehribonlik uyida ulg‘aygan. O‘zlarining bir yoshli farzandini sotishga sabab qilib karantin davridagi qiyinchiliklarni ko‘rsatishgan.

«Karantin davrida bizga qiyin bo‘ldi. Ishimiz ham yo‘q edi. Mahalladan yordam so‘radik, ammo yordam berishmadi», — deydi erkak.

Erkakka nisbatan JKning 135-moddasi 3-qismi «a» bandiga asosan 8 yil ozodlikdan mahrum qilish jazosi tayinlandi. Bolaning onasiga tayinlangan jazo uch yillik sinov muddatiga almashtirilgan.