AQShlik tangashunos juda noyob bo‘lgan million dollar turuvchi tanganing egasiga aylandi. Bu haqda «RIA Novosti» xabar bermoqda.

Gap 1854-yili San-Fransiskoda zarb etilgan besh dollarlik tanga haqida ketmoqda. U 300 tadan kam nusxada chiqarilgan bo‘lib, shu kungacha bu tangalardan faqat uchtasi qolgan deb hisoblanayotgan edi. Ulardan biri Vashingtondagi Smitson institutida, ikkinchisi shaxsiy kolleksiyada, uchinchisi esa 1967-yili AQShning eng boylaridan bo‘lgan Dyuponlar oilasidan o‘g‘irlangan edi. Ta’kidlanishicha, uchinchi tanga haligacha topilmagan.

Ismi oshkor qilinmayotgan tanga egasi avvaliga uni qalbaki deb o‘ylagan. Ammo noyob tangalarning haqiqiyligini aniqlash bilan shug‘ullanuvchi «Numismatic Guaranty Corporation» kompaniyasi mutaxassislari uning haqiqiyligini tasdiqlashdi. Bundan tashqari, ular suratlarni solishtirib, topilgan tanga Dyuponlar kolleksiyasidan o‘g‘irlangan tanga emasligini ham aniqlashdi.

«Numismatic Guaranty Corporation» rahbari Richard Montgomerining aytishicha, topilma qiymati million dollarni tashkil etadi.