Фойдаланувчиларга мобил иловалар яратишда ёрдам бериб келган «Наташа» нейротармоғи фош этилди, ҳеч қандай сунъий интеллектнинг унга алоқаси йўқ, ўрнига юзлаб ҳинд дастурчилари ишлатилган.

Британиянинг сунъий интеллектга асосланган Builder܂AI стартапига 2016 йилда икки ҳинд тадбиркори асос солган. Natasha AI — шу компаниянинг чат-боти. Стартап фаолияти давомида $480 миллиондан зиёд сармоя жалб эта олди, шунчалик ишончни қозонгандики, SoftBank, Insight Partners ва Microsoft каби саноат гигантлари унга пул тикканди. 2018 йилда компания $1,5 миллиардга баҳоланиб, IT-бозор «яккашохи»га айланди ҳамда сунъий интеллект соҳасидаги энг умидли лойиҳалардан бири сифатида қарала бошланди.

Financial Times газетаси аниқлик киритишича, шу ўтган йиллар давомида генератив сунъий интеллект ўрнига кодни Ҳиндистондаги 700 нафар дастурчи қўлда ёзиб келган. «Наташа» чат-ботидан фойдаланувчилар иловаларни ишга туширишда тинмай муаммоларга йўлиқишлари ҳам лойиҳанинг салкам 10 йил ишлашига халақит бера олмади.

Кеча кредитор унинг ҳисобидан 37 млн долларни қайтариб олганидан сўнг, стартап ўзини банкрот деб эълон қилди. Компания раҳбарияти молиявий кўрсаткичларни сохталаштиришда ҳам гумон қилиняпти.